Arian Agushi, apo siç njihet për publikun Gold AG, ka qenë i ftuar në Debat Plus për të folur mbi temën ‘Patriotizmi dikur dhe sot’.
Artisti nga Presheva ka vlerësuar interpretimin e këngëve patriotike si një pjesë e rëndësishme e identitetit të tij artistik.
Gjatë bisedës, ai thotë se këto këngë janë një mjet i fuqishëm për të shprehur ndjenja të thella kombëtare, e që të mos përdoren vetëm si mjet për përfitime financiare.
Këngëtari thekson se për të realizuar një të tillë duhet ta ndjesh dhe ta kuptosh mesazhin që përçon.
37-vjeçari shton se këngët e tij janë të mbushura me tekstet që burojnë nga zemra dhe përmbajnë histori të vërteta.
“Varet kush, por nëse kënga patriotike ta jep një vlerë si person edhe mundesh me përfitu prej asaj, më mirë me përfitu prej vlerës se antivlerës. Kështu që tash varet secili qysh e ndjen, edhe prej kohës që ka qenë patriot dikush s’mund të bëhet patriot me 40 vjet, nëse dallohet se e ka trashëgimi ose e ka dëshmuar kohë të gjatë prej fëmijërisë tij patriotizmin e vet, por nëse me 50 vjet iu teket ta bëjë një këngë patriotike është punë biznesi”, u shpreh ai.
Gold AG në vazhdim tha: “Më mirë me këndu këngë patriotike, por isha kënaq nëse e ndiejnë atë që e këndojnë. Unë kur e shkruaj e ndiej se ka raste që më dalin edhe lot. Çdo këngë e imja është me tekst temin, burojnë nga zemra dhe janë me histori të vërteta sidomos këngët patriotike”.
ks
