Arbër Paplekaj, ish-efektivi i RENEAS që është shpallur fajtor për vrasjen e mjekut Pjerin Xhuvani, kërkon nga Gjykata e Apelit rishikimin e vendimit për dënim me 22 vite burg. Xhuvani mbeti i vdekur 4 ditë para zgjedhjeve të 25 Prillit 2021 dhe njihej si mbështetës i PS.
Gjashtë muaj më parë, Arbër Paplekaj u shpall fajtor nga Gjykata e Elbasanit dhe u dënua për veprat penale “Vrasja në rrethana të tjera cilësuese kundër dy ose më shumë personave dhe në mënyrë të rrezikshme për jetën e shumë personave”, “Vrasja e punonjësve të Policisë së Shtetit, e mbetur në tentativë”, “Heqja e paligjshme e lirisë e kryer me dhunë” në bashkëpunim.
Ngjarja e rëndë në Elbasan ka ndodhur pak ditë para zgjedhjeve të 25 prillit 2021, ku siç u tha pati shkëmbim zjarri kur u kap makina e shtabit të PS-së nga Struktura e Mbrojtjes së votës, e ngritur nga PD, duke shpërndarë para në këmbim të votës.
I vrarë mbeti Pjerin Xhuvani, u plagos efektivja Xhensila Sota dhe tre persona të tjerë. Paplekaj pranoi krimin dhe u vetëdorëzua në Repartin e Forcave RENEA në Tiranë duke thënë se qëlloi për vetëmbrojtje pasi u qëllua më parë nga persona që sipas tij po blinin vota.
Ai nuk ka pranuar dënimin me 22 vite burg dhe ka bërë rekurs në Gjykatën e Apelit, nga e cila kërkon një vendim më të lehtë për shkak se pretendon se është detyruar të hapë zjarr në kushtet e vetëmbrojtjes. Në të njëjtin gjyq me të janë dhe dy ish-zv.drejtorë të Policisë së Elbasanit dhe disa efektivë të “Shqiponjave”.
Pikërisht, këtë pretendon dhe Arbër Paplekaj. Ai thotë se në kushtet kur punonjësit e policisë dhe dy ish-zv.drejtorët kanë qenë të pranishëm gjatë konfliktit mes mbështetësve të PS dhe atyre të PD por nuk kanë ndërhyrë, kur sherri ka agravuar është detyruar të përdorë armën e zjarrit.
“Kam kaluar testin e integritetit nga agjencitë amerikane kur jam dërguar ne Afganistan. Jam dekoruar nga kryeministri për luftën e antiterrorist. Kam qenë 10 vjet me armë në brez. 10 vjet jam përplasur me grupe kriminale dhe kurrë s’e kam përdorur. Pasi më shanë, më dhunuan dhe më qëlluan shokun me plumb më thoni ç’duhet të beja? Nuk pata rrugë tjetër. Nuk desha me e vra atë djalë.
Nuk gëzova me e vra atë djalë. Mbrojta jetën teme. U përballa me instiktet. Jam ish anëtar i forcave speciale. Dhe instikti i parë për të cilin jam stërvitur është të reagoj kur rrezikohet jeta ime apo e dikujt. Në momentin që sheh armën reagon. E njihni teorinë e qenve të Pavollovit? S’kam vepruar me zemër. Kam qenë makineri. Kam reaguar si jam stërvitur për dhjetëra vite”, tha ish-efektivi kur u dorëzua.
A ju ndihmoi ky artikull?PoJo
