Izraeli do të ndajë 100 miliardë shekelë (27 miliardë dollarë) për të zgjeruar rrjetin hekurudhor dhe madje do të hapë rrugën për t’u lidhur me Arabinë Saudite, njoftoi kryeministri Benjamin Netanyahu.
Nisma lidhet me një iniciativë të qetë diplomatike të SHBA-së për të vendosur marrëdhënie diplomatike midis Tel Avivit dhe Riadit. Këshilltari i Sigurisë Kombëtare, Jake Sullivan dhe Koordinatori i Shtëpisë së Bardhë, Brett McGurk, u takuan me princin e kurorës saudit Mohammed bin Salman në Xhed të enjten dhe diskutuan “iniciativat për të avancuar vizionin e përbashkët për një rajon më paqësor, më të sigurt, më të begatë dhe më stabil”.
Shtëpia e Bardhë nuk e përmendi drejtpërdrejt Izraelin, por pajtimi me mbretërinë saudite do të ishte një arritje historike për administratën e presidentit Joe Biden, i cili nuk ka marrëdhënie veçanërisht të mira as me kryeministrin Netanyahu, as me Princin Salman. Biden tha disa javë më parë se Riadi dhe Tel Avivi ishin larg një marrëveshjeje për normalizimin e marrëdhënieve, por vuri në dukje se Shtetet e Bashkuara do të përfshiheshin në garantimin e paktit të mbrojtjes dhe programit bërthamor për qëllime civile.
New York Times raportoi se Izraeli duhet të bëjë “lëshime serioze” për palestinezët nëse dëshiron të normalizojë marrëdhëniet me Arabinë Saudite.
Duke injoruar protestat masive mbi reformat e diskutueshme në drejtësi, Netanyahu hapi seancën e kabinetit të së dielës me tema ekonomike, duke promovuar projektin ambicioz “Një Izrael”. Qëllimi i nismës është të shkurtojë udhëtimin dhe transportin me tren në të gjithë Izraelin në më pak se dy orë, gjë që do të kërkojë degëzimin e rrjetit hekurudhor.
– Në të ardhmen, ne do të mund të transportojmë mallra me hekurudhë nga Eilat në Mesdheun tonë dhe gjithashtu do të mund të lidhemi me tren me Arabinë Saudite dhe Gadishullin Arabik. Ne jemi duke punuar për këtë – tha Netanyahu në fjalimin e transmetuar në televizionin kombëtar.
Me seksionin 400 kilometra, Deti i Kuq dhe Deti Mesdhe duhet të lidhen për rreth dy orë, me trena ekspres me shpejtësi maksimale 250 kilometra në orë. Është planifikuar që linjat e reja të ndërtohen brenda dhjetë viteve dhe i gjithë projekti do të realizohet më së voni deri në vitin 2040, duke lidhur Kiryat Shmona me Karmiel, Tel Aviv me Beersheba përmes aeroportit Ben Gurion dhe Beersheba me Eilat përmes Dimona.
