Zëvendëskryeministri i Parë në detyrë dhe Ministri i Punëve të Jashtme dhe Diasporës i Kosovës, Glauk Konjufca, dhe Ministri për Evropën dhe Punët e Jashtme i Shqipërisë, Ferit Hoxha, mbajtën një konferencë të përbashkët për media pas takimit të zhvilluar në Prishtinë, ku diskutuan për bashkëpunimin ndërmjet dy vendeve, integrimin euroatlantik dhe zhvillimet politike në rajon.
Konjufca tha se koordinimi i politikës së jashtme ndërmjet Kosovës dhe Shqipërisë është ndër proceset më të lehta dhe më natyrale për të dy shtetet.
Konjufca thotë se Shqipëria do të anëtarësohet në BE brenda dy-tri viteve
“Të koordinosh politikën e jashtme mes dy shteteve si Kosova dhe Shqipëria është gjëja më e lehtë, sepse ne do të pasqyrojmë interesat e të njëjtit komb. Prandaj, edhe politika jonë e jashtme është një politikë e jashtme unike. Orientimet strategjike ka vlerat perëndimore dhe rruga euro-atlantike është përcaktim i kombit shqiptar. Dhe në këtë rrugëtim, vendet tona janë gjithmonë krah njëra-tjetrës. E shfrytëzoj rastin ta përgëzoj ministrin Boja për arritjet e Shqipërisë në procesin e integrimit drejt Bashkimit Evropian. Tash në ditët e sotme, situata ka ndryshuar prej dy viteve më përpara, kjo edhe për shkak të transformimeve të mëdha të Republikës së Shqipërisë. Të gjithë zyrtarët edhe evropianë, të cilët po i takoj dhe vet, po thonë që Shqipëria është e dyta në radhë për anëtarësim në Bashkimin Evropian. Kjo është një arritje shumë e madhe “, tha ai.
Ai i ka kërkuar ministrit Hoxha mbështetjen e Shqipërisë për anëtarësim më të shpejtuar të Kosovës në NATO.
Konjufca: I kërkova ministrit Hoxha angazhim për një afrim më të përshpejtuar në NATO
“Koordinimi mes shteteve tona është një domosdoshmëri jetike. Ne duhet ta promovojmë rolin tonë si faktor i stabilitetit në rajon. Krahas orientimit euro-integrues të shteteve të rajonit, anëtarësimi në NATO i shumicës së shteteve në rajonin tonë, konkludojmë të gjithë që ka qenë faktor i stabilitetit. Në këtë drejtim, i kërkova ministrit Hoxha mbështetjen e Shqipërisë për aspiratën tonë për një afrim dhe anëtarësim më të shpejtuar të Kosovës në NATO. Kosova ka ndërtuar dhe po forcon kapacitetet e saj të mbrojtjes në përputhje me standardet e NATO-s dhe është e gatshme të bëhet pjesë e arkitekturës së sigurisë së kësaj aleance, jo vetëm për garantimin e paqes dhe stabilitetit në rajon, por edhe kudo në botë, në mbështetje të vlerave demokratike dhe euro-atlantike. Për Kosovën, mbështetja e Shqipërisë në procesin drejt Bashkimit Evropian është shumë e nevojshme, është shumë e rëndësishme. E falënderoj ministrin Boja që kjo po ndodh vazhdimisht. Por gjithmonë është e mirëpritur dhe një dinamikë e re edhe nga ana jonë, edhe nga ana e Shqipërisë“, tha ai.
Kurse, sa i përket mbledhjes së dy qeverive, Konjufca tha se qershori ka qen si ide por që tash është koha e zgjedhjeve.
Konjufca: Mbledhja e dy qeverive pas formimit të institucioneve
“Qershori ka pasë qenë si njëfarë lloj ideje për atë kohë, nëse po flisni për vizitën e zonjës Spiropali. Tash, kjo nuk duhet të humbet si ide, mirëpo me siguri që do ta shtyjmë në momentin që kryhet krejt procedura e legjitimimit të institucioneve të reja, të legjislaturës së re. Legjislatura e re pritet ta nxjerrë qeverinë, qeverinë e re, dhe pastaj të ecim tutje. Por, kjo nënkupoton që korriku dhe gushti pastaj nuk do të jenë aty, e të shohim pastaj shtatorin dhe tetorin nëse do të mund të jenë muaj të përshtatshëm për mbajtjen e mbledhjes së qeverive”, tha ai.
Mbledhjen e përbashkët në mes dy vendeve e komentoi edhe Ministri për Evropë dhe Punë të Jashtme të Shqipërisë Ferit Hoxha.
Hoxha: Jemi të gatshëm për mbledhjen e përbashkët
“Nuk ka shumë rëndësi se ku do të bëhet. Në mënyrë të padiskutueshme është një mekanizëm i konsoliduar tashmë. Natyrisht që ne do të presim zhvillimin e zgjedhjeve, konstituimin e institucioneve, siç po thoshte ministri, dhe në momentin më të parë që të dy qeveritë të jenë gati, do të jenë takimet që përgatiten. Do të jemi shumë të lumtur të vazhdojmë me këtë mekanizëm që e ka treguar veten që është absolutisht një element dhe mekanizëm shumë i rëndësishëm për të forcuar marrëdhëniet mes dy vendeve, por nuk ka një pikë dyshimi që, qoftë me këtë mekanizëm apo me të tjerë, qoftë me mbledhjen e qeverisë me qeveri apo mes ministrave të veçantë për të bërë, për të avancuar në aspektet e veçanta, kjo është kjo është diçka që është krejt e natyrshme dhe vetëm në rritje do të vijë duke u forcuar”, tha ai.
Hoxha tha se diskutimet e sotme ishin të sinqerta dhe vëllazërore sepse vetëm ashtu mund të jenë diskutimet në mes tyre.
Hoxha: Çdo dhimbje e Kosovës ndihet në Shqipëri sic ndihet cdo sukses
“Ne në Tiranë, në Shqipëri, nuk do ta thonim kurrë mjaftueshëm. Kosova është prioritet absolut i politikës sonë të jashtme. Është një dimension i qartë dhe i pandryshueshëm i shtetit shqiptar, i qeverisë shqiptare dhe shtetit shqiptar. Ajo që ndodh në Kosovë ka rëndësi të drejtpërdrejtë për Shqipërinë, në lidhje të ndërsjella, të pandashme, sepse përparimi i Republikës së Kosovës dhe ai i Shqipërisë ecin krah për krah. Çdo dhimbje e Kosovës ndihet në Shqipëri, ashtu si çdo arritje e Kosovës festohet edhe në Shqipëri. Ramë dakord që dinamika gjeopolitike në rajon dhe në Evropë kërkon një intensifikim të mëtejshëm të koordinimit ndërqeveritar dhe diplomatik. U angazhuam për përgatitjet e takimeve të radhës, takimet ministrore, apo dhe më lart siç do të jetë më e nevojshme, për aktivizimin më funksional të sekretariatit koordinues të mbledhjeve të përbashkëta që kemi bërë, në përcaktimin e qartë të fushave ku duhet të bëjmë më shumë, më shpejt apo të përshpejtojmë. Bashkëpunimi ynë duhet të kthehet më shumë lehtësi dhe më pak burokraci, më shumë në çdo hollësi, zbatimi dhe koordinimi në projekte konkrete, të cilat kanë impakt tek qytetarët”, tha ai.
Sipas tij, dialogu Kosovë-Serbi, i lehtësuar nga Bashkimi Evropian është rruga e duhur drejt një zgjedhjeje të qëndrueshme dhe konsolidimit të paqes afatgjatë mes dy vendeve fqinje.
Hoxha: Aplikimi i Kosovës për të marrë statusin e vendit kandidat nuk është dhuratë
“Në këtë frymë, pranimi i aplikimit të Kosovës për të marrë statusin e vendit kandidat nuk është dhuratë, është mundësi, sepse përthehet në përshpejtim të reformave dhe vlerave demokratike, është investim për të ardhmen e përbashkët. Në këtë kuadër duhet parë dhe dialogu për normalizimin e marrëdhënieve me Serbinë. Ne mendojmë se dialogu i lehtësuar nga Bashkimi Evropian është rruga e duhur drejt një zgjedhjeje të qëndrueshme dhe konsolidimit të paqes afatgjatë mes dy vendeve fqinje. Ndryshimet gjeopolitike dhe paparashikueshmëria siç e përmenda, në rritje na ftojnë për një qasje sa më proaktive për të kthyer kohën që kalon nga kosto në përfitim. Një Kosovë me më shumë miq, e gjithëpranuar dhe e mirëintegruar në strukturat ndërkombëtare do të jetë edhe më e fortë, dhe më e sigurt, dhe më e zhvilluar, edhe më e begatë“, tha ai.
Megjithatë, nuk harroi as aspektin e sigurisë, ku këroi që përgjegjësit e sulmit terrorisë në Banjska të dalin para drejtësisë.
Hoxha: Kush prek Kosovën, prek Shqipërinë
“Shqipëria nuk do të pranojë e as nuk do të tolerojë ndonjëherë cenimin e sigurisë së qytetarëve dhe institucioneve të Kosovës dhe do të jetë gjithmonë në krah të Kosovës. Kam ardhur këtu sot për të transmetuar dhe për të theksuar qartë atë që ka thënë kryeministri Rama, ku shpreh: “Kush prek Kosovën, prek Shqipërinë”, tha ai.
Hoxha ka komentuar edhe një inciativë proserbe për çnjohjen e pavarsisë së Kosovës.
Hoxha: Shqipëria nuk do të lejon inciativa kundër Kosovës
“Kushdo që ende nuk e ka kuptuar që Republika e Kosovës është një realitet i pakthyeshëm politik, juridik, dhe ndërkombëtar, jeton në një kohë tjetër, sheh ëndrra me sy hapur, dhe do t’i quaja thjesht somnambul politik. Republika e Kosovës përbën një investim të pashlyeshëm, siç e theksova më parë, për paqen, stabilitetin, dhe pajtimin në rajon, për ndërtimin e urave të bashkëpunimit dhe të bashkëjetesës dhe fqinjësisë së mirë mes popujve, aq e nevojshme në rajonin tonë ku kemi akoma punë për të bërë. Kështu që çdo ide, nismë apo përpjekje për të vënë në dyshim këtë realitet, përveçse jorealist, shkon në kundërshtim me frymën e bashkëpunimit, me gjithë atë që ne kemi injektuar, me gjithë atë që ka injektuar edhe Kosova, edhe Shqipëria, edhe Bashkimi Evropian, dhe të tërë aleatët dhe partnerët tanë, dhe absolutisht kjo gjë nuk do të tolerohet. Dhe rajoni ynë ka më shumë nevojë për dialog, për besim, për marrëdhënie të fqinjësisë së mirë, dhe jo rikthim në narrativa që i përkasin një kohe tjetër dhe që nuk kanë asgjë të përbashkët me Evropën e sotme dhe me të ardhmen tonë të përbashkët evropiane. Ne duhet të nxjerrim mësime nga e kaluara, dhe jo ta përsërisim të kaluarën. Dhe siç e thashë edhe më parë, ato janë nisma periferike, por gjithsesi nuk mund të neglizhohen dhe nuk do t’i neglizhojmë. Unë kam biseduar me autoritetet e Malit të Zi, dhe më kanë siguruar që absolutisht në asnjë mënyrë qëndrimi i Malit të Zi, si një vend fqinj, si një vend që e ka njohur Kosovën, si një vend që dëshiron marrëdhënie të mira me Kosovën, nuk do të ndikohet nga thirrje të tilla”, tha ai.
Ai u ndal edhe te zgjedhjet e 7 qeshtorit, duke thënë se shpresojnë që nga zgjedhjet të dalin institucione të Kosovës, pasi ashtu pret Shqipëria dhe miqët.
Pas konferencës, të dy ministrat kanë bërë homazhe tek memoriali heroinat.
