Shkencëtarët japonezë kanë krijuar me sukses një fytyrë robotike që mund të buzëqeshë, me lëkurë të vërtetë si të njeriut, duke shënuar një përparim të rëndësishëm. Studiuesit në Universitetin e Tokios zbuluan si të lidhin lëkurën e krijuar në laborator në fytyrat mekanike, duke lejuar robotët të bëjnë mimika si njerëzit.
Ata u shprehën se ky përparim do të hapë dyert për zhvillimin e robotëve humanoidë më realistë, me më shumë lëvizshmëri dhe ndjeshmëri. Gjithashtu, studiuesit thanë se kjo arritje e inxhinierisë premton për industrinë e kozmetikës dhe për trajnimin e kirurgëve plastikë. Sipas tyre, lëkura nuk është vetëm e butë, por mund të vetë-rigjenerohet nëse dëmtohet, duke kopjuar ligamentet e lëkurës njerëzore.
Ekipi i shkencëtarëve kishin tentuar të përdornin mini-kapëse si ankorë, por ato e shqyen lëkurën eksperimentale kur roboti nisi të lëvizte. Për të ricikluar ligamentet elastike në lëkurën njerëzore, ata hapën vrima të vogla në fytyrën e robotit dhe përdorën një xhel kolagjeni për të lidhur me të lëkurën e krijuar në laborator.
Profesor Shoji Takeuchi, studiuesi kryesor: “Duke imituar strukturën e ligamenteve të lëkurës njerëzore dhe duke përdorur vrima të formës V, me materiale të forta, gjetëm një mënyrë për të lidhur lëkurën me strukturat komplekse. Fleksibiliteti natyral i lëkurës dhe metoda e fortë e ngjitjes bëjnë që lëkura të mos shqyhet nga lëvizjet”.
Profesor Takeuchi, pioner në fushën e robotikës biohibridea, shpreson që të arrijnë të përmirësojnë trashësinë e lëkurës dhe të duket sa më reale, duke shtuar gjëndrat e djersës, poret, enët e gjakut, yndyrën dhe nervat.
Një sfidë tjetër sipas tij do të jetë krijimi i shprehive njerëzore duke integruar aktivizues ose muskuj të sofistikuar brenda robotit.
Laboratori i tij ka krijuar tashmë robotë të aftë për të ecur duke përdorur indet biologjike të muskujve, mish të krijuar në laborator 3D dhe lëkurë artificiale që vetë-rigjenerohet. Në fillim të këtij muaji, “EXROBOTS”, një kompani kineze, zbuloi kokat e tyre robotike humanoide mjaft realiste që mund të imitojnë shprehjet e fytyrës dhe emocionet.
Të kompletuar me buzëqeshje, mjekër dhe aftësi për të nxjerrë gjuhën jashtë, krijuesit e tyre thonë se humanoidet që kushtojnë prej 162,600 £ janë ndër më të avancuarit në botë.
