Një imazh i marrë nga roveri Curiosity i NASA-s në Mars është bërë viral për shkak të një forme të çuditshme që duket në sipërfaqen e Planetit të Kuq. Në fotografi, një siluetë e errët ngjan në mënyrë të habitshme me një kandil deti që fluturon mbi Mars, duke nxitur reagime dhe spekulime në rrjetet sociale. Fotografia është realizuar më 20 gusht 2023.
Megjithatë, pavarësisht pamjes së pazakontë, ekspertët kanë hedhur poshtë mundësinë që në fotografi të jetë një krijesë e gjallë, një objekt fizik apo edhe një UFO. Shpjegimi më i mundshëm lidhet me vetë kamerën e roverit.
Studiuesit kanë analizuar edhe fotografitë e tjera të marra nga i njëjti pozicion, vetëm 13 dhe 25 sekonda para imazhit në fjalë. Në ato fotografi, forma misterioze nuk shfaqet fare.
Kjo ka bërë që ekspertët ta konsiderojnë atë si një gabim digjital ose njollë të krijuar nga goditja e një rrezeje kozmike në sensorin e kamerës.
Marsi është më i ekspozuar ndaj grimcave dhe rrezatimit kozmik sesa Toka, pasi nuk ka një fushë magnetike të fuqishme dhe atmosfera e tij është shumë më e hollë. Për këtë arsye, sensorët e pajisjeve të dërguara në Planetin e Kuq mund të regjistrojnë herë pas here pika, njolla ose forma të pazakonta.
Pra, ajo që në pamje duket si një “kandil deti” që fluturon mbi Mars, me shumë gjasë është vetëm një artefakt i krijuar nga rrezatimi kozmik në kamerën e Curiosity dhe jo një zbulim i një forme të panjohur jete.
