Ish-drejtuesi i Policisë, Mit’hat Havari, ka dalë me akuza të forta ndaj PDK-së dhe ish-drejtuesve të saj, në një reagim që prek edhe debatin e sotëm për trashëgiminë e luftës së UÇK-së.
Sipas deklaratës së publikuar, Havari kërkon që PDK-ja të kërkojë falje për veprimet që ai ua atribuon ish-krerëve të saj, duke pretenduar se gjatë dhe pas luftës janë vrarë shqiptarë për motive politike.
“PDK-ja duhet të kërkonte falje për krerët e tyre. Vranë vëllezërit për pushtet! Bënë pis luftën e UÇK-së.”
Deklarata vjen në një moment të ndjeshëm për Kosovën, pas vendimit të Gjykatës Speciale në Hagë ndaj Hashim Thaçit, Kadri Veselit, Rexhep Selimit dhe Jakup Krasniqit. Aktgjykimi ka rikthyer në qendër të debatit publik jo vetëm çështjen e përgjegjësisë penale të ish-krerëve të UÇK-së, por edhe diskutimet për historinë politike të Kosovës, zhvillimet brenda strukturave të dala nga lufta dhe periudhën e pasluftës.
Në këtë atmosferë, reagimi i Havaris e zhvendos vëmendjen edhe te një tjetër kapitull i debatueshëm – akuzat për vrasje politike dhe konfliktet ndërshqiptare që kanë shoqëruar skenën politike të Kosovës në vitet pas përfundimit të luftës.
