Reperit Mozzik i janë konfiskuar dy orat e shtrenjta sonte në Aeroportin e Prishtinës, ku vlera e një ore kap mbi 1.5 milionë euro, raporton Tëvë1.
Rasti i konfiskimit është konfirmuar për Teve1 nga Dogana e Kosovës, por ata nuk kanë dhënë më shumë detaje.
Arsyeja e konfiskimit lidhet me dyshimet mbi origjinën e dy orëve luksoze, të cilat sipas raportimeve kanë vlera të larta.
Në rrjetet sociale gjatë ditës, reperi publikoi një nga orët, duke e prezantuar si dhuratë vetjake për ditëlindjen:
“I bëra vetes një dhuratë para ditëlindjes,” shkroi Mozzik duke ekspozuar orën e markës së famshme Richard Mille.
Njëra nga orët karakterizohet nga një kornizë transparente prej safiri kristali dhe një rrip i bardhë elegant. Sipas raportimeve, çmimi i saj kap vlerën e rreth 1.5 milionë eurove.
Hetimet vazhdojnë për të përcaktuar prejardhjen e orëve luksoze dhe rrethanat e konfiskimit.
