Nerim Çela, vëllai i trafikantit të drogës Gëzim Çela, ka çuar në Gjykatën e Lartë vendimin e SPAK për sekuestrimin e më shumë se 10 pasurive. Gëzim Çela u prangos në ditët e para të Dhjetorit 2023 në Kosovë, ku i fshihej drejtësisë shqiptare dhe tashmë pritet të ekstradohet.
Vëllai i ish-policit që tashmë konsiderohet “baron droge” kërkon nga Gjykata e Lartë që të rrëzojë kërkesën e SPAK për sekuestrimin e pasurive.
Bëhet fjalë për shoqërinë “Royal Blu” Sh.p.k, disa makina, katër gomone dhe mijëra euro para të gatshme që janë gjetur në shtëpi dhe ambientet e tjera, në pronësi të Gëzim Çelës dhe të vëllait. Rekursi është regjistruar dy ditë më parë, më datë 22 Janar 2024.
Relatore e çështjes është caktuar gjyqtarja e lartë Albana Boksi, por deri tani nuk është caktuar një datë se kur kërkesa apo rekursi do të shqyrtohet.
Pasuritë e sekuestruara nga SPAK, të cilat dyshohet se rrjedhin nga aktiviteti kriminal:
- Shoqëria “Royal Blue” Sh.p.k, e themeluar në datë 26 Tetor 2022 me administratore dhe ortake të vetme me 100% të kuotave shtetasen M.Th. me objekt aktiviteti Bar Restorant dhe adresë Lezhë, Laç, Qarku Lezhë, Bashkia Laç, Njësia administrative Fushë-Kuqe, Fshati Patok, Pasuria nr. 1759, Zona kadastrale 1673;
- Automjet i markës Volkswagen, modeli Golf viti i prodhimit 2020 ngjyrë e bardhë me targë, në pronësi të N. Ç.;
- Automjet i markës Audi, modeli Q8, viti i prodhimit 2018, ngjyrë e bardhë, në pronësi të N. Ç.;
- Automjet i markës Audi, modeli A8, viti i prodhimit 2017, ngjyrë gri e errët, në pronësi të shtetasit A. I.;
- Automjet i markës Wolkswagen, modeli Golf, viti i prodhimit 2015, gjyrë gri, në pronësi të shoqërisë “Ayla” shpk.;
- Mjet lundrues tip Gomone, me ngjyrë gri, me gjatësi 9 m dhe gjerësi 2.7 m, me tre motorë me ngjyrë të zezë, të markës Yamaha 350 V8;
- Kartëmonedha të prerjes 50 euro, 200 copë, sekuestruar shtetasit A. I.;
- Shuma monetare 35 000 (tridhjetë e pesë mijë) Euro, 500 (pesëqind) paund britanik, 50 (pesëdhjetë) franga zvicerane dhe 2 344 500 (dy milion e treqind e dyzetë e katër mijë e pesëqind) lekë, sekuestruar shtetasit N. Ç.;
- Mjet ujor Zip, gomone me gjatësi rreth 7 metra, me 1 motorr ‘entrobord’, tip Ratox me numër M6237725, ngjyrë e zezë e vendosur në karrelin me numër ROMA86/52;
- Mjet ujor tip gomone me ngjyrë gri me mbishkrimin AKUILA NERA SEM, me 1 motorr tip SUZUKI, me fuqi 150 hp me numër 02/0z/580020;
- Mjet ujor tip gomone, ngjyrë e zezë me gjatësi rreth 10m me mbishkrimin “G-RS”, me 2 motor tip Suzuki me fuqi 300 hp secili me numra 3000ZP – 245968 dhe 3000ZP – 245/92.
Lexo edhe: Del FOTO e Gëzim Çelës, “Baroni i drogës” që i ka shpëtuar disa here drejtësisë
A ju ndihmoi ky artikull?PoJo
