Presidentja e Komisionit Evropian, Ursula von der Leyen, do të nisë të dielën një vizitë katërditore në Maqedoninë e Veriut, Kosovë, Mal të Zi, Serbi dhe Bosnjë e Hercegovinë.
Ajo do të udhëtojë për në Prishtinë të hënën, ku do të takohet me Presidenten Vjosa Osmani dhe Kryeministrin Albin Kurti. Ajo do t’u prezantojë udhëheqësve rajonalë Planin e Rritjes së BE-së për Ballkanin Perëndimor.
“Ky do të jetë një rast për të diskutuar bashkëpunimin dypalësh dhe veçanërisht për t’u prezantuar më në detaje udhëheqësve rajonalë Planin e Rritjes së BE-së për Ballkanin Perëndimor.
Të hënën ajo do të udhëtojë për në Prishtinë, ku do të takohet me Presidenten dhe kryeministrin e Kosovës, Vjosa Osmani dhe Albin Kurti”, thuhet në njoftim që ka lëshuar Zyra e Bashkimit Evropian në Kosovë.
Nuk përjashtohet mundësia që presidentja e Komisionit Evropian të diskutojë me liderët më të lartë të Kosovës edhe për situatën me Serbinë. Tre ditë më parë, Albin Kurti njoftoi nga Brukseli se kishte pranuar propozimin për nënshkrimin e Marrëveshjes me Serbinë, por Vuçiç kishte refuzuar.
