Dajana, Princesha e Uellsit, lindi si Dajana Spenser me 1 korrik 1961. Fejesa e saj, në moshën 19-vjeçare, me Princin Çarls, trashëgimtarin e fronit britanik, e vendosi menjëherë në qendër të vëmendjes. Pas “Dasmës së Shekullit” në vitin 1981 dhe lindjes së dy djemve, Uilliamit (1982) dhe Herrit (1984), martesa filloi të shpërbëhej. Çifti u nda në vitin 1992 dhe u divorcua në vitin 1996. Ndërkohë, vëmendja e mediave ndaj Dajanës vetëm sa u shtua. Ajo e përshkroi këtë mbikëqyrje të vazhdueshme si “një përvojë izoluese”.
Pavarësisht vështirësive në jetën private, Princeshë Dajana u bë një figurë publike jashtëzakonisht e dashur dhe e përdori famën e saj për të tërhequr vëmendjen ndaj çështjeve humanitare, si epidemia e AIDS-it dhe çminimi i zonave të minuara. Ajo u tha gazetarëve: “Do të doja të isha mbretëresha e zemrave të njerëzve, në zemrat e tyre, por nuk e shoh veten si mbretëreshë të këtij vendi.” Dajana vdiq në moshën 36-vjeçare në një aksident automobilistik në Paris, ndërsa makina ndiqej nga paparacët. Vdekja e saj e parakohshme solli trishtim të madh. Rreth 1 milion njerëz u rreshtuan në rrugët e Londrës për kortezhin mortor të “princeshës së popullit”. Dajana prehet në Althorp, në rezidencën historike të familjes së saj.
1. Dajana në adoleshencë, 1980
Pasi ishte shoqëruar për një kohë me Sarah Spenserin, Princi Çarls e ktheu vëmendjen te motra e saj më e vogël, Dajana. Çarls i propozoi Dajanës në Kështjellën Windsor në shkurt të vitit 1981, pasi ishin takuar vetëm 13 herë. Dajana ishte 19 vjeçe kur u fejua me princin 32-vjeçar. Kur lajmi u bë publik me 24 shkurt, gazetarët u dyndën rreth adoleshentes së ndrojtur, e cila më parë kishte punuar si ndihmëse në një kopsht fëmijësh dhe tani ishte e destinuar të bëhej princeshë.
2. Dasma mbretërore, 29 korrik 1981
Dasma e Princit Çarls me Ledi Dajana Spenserin në Katedralen e Shën Palit, me 29 korrik 1981, u quajt “Dasma e Shekullit”. Rreth 750 milionë njerëz në mbarë botën ndoqën transmetimin e ceremonisë dhe çiftin mbretëror teksa ecte drejt altarit. Fustani i Dajanës kishte një bisht 7.6 metra të gjatë, mëngë romantike të fryra dhe dantella që kishte qenë në pronësi të Mbretëreshës Meri. Dajana zgjodhi të mos përfshinte fjalën “bindem” në betimet martesore dhe gjatë ceremonisë ngatërroi pa dashje rendin e dy emrave të parë të bashkëshortit të ardhshëm. Puthja e tyre ikonike në ballkonin e Pallatit Buckingham nisi një traditë të re mbretërore.
3. Me djalin e saj të porsalindur, Uilliamin, 1982
Dajana shkëputi një traditë shekullore të familjes mbretërore duke zgjedhur të sillte në jetë trashëgimtarin e fronit britanik në një spital publik dhe jo në një pallat. Princi Uilliam lindi me 21 qershor 1982. Fotot e saj me foshnjën e porsalindur në shkallët e krahut Lindo të Spitalit St. Mary treguan qasjen e saj më të afërt dhe më të zakonshme ndaj mëmësisë.
4. Duke kërcyer me XhonTravoltën në Shtëpinë e Bardhë, 1985
Në vitin 1985, aktori amerikan Xhon Travolta ishte një superyll falë roleve të tij në Saturday Night Fever dhe Grease. Zonja e Parë Nensi Regan organizoi që ai të kërcente me Dajanën gjatë vizitës së saj mbretërore në Shtëpinë e Bardhë. Në fotografinë e famshme, Travolta rrotullon në vallëzim princeshën 24-vjeçare, e cila ka veshur një fustan të Victor Edelstein, me shpatullat e zbuluara. Travolta e quajti atë një “moment si në përralla”.
5. Duke i shtrënguar dorën një pacienti me AIDS, prill 1987
Në vitin 1987, në kulmin e epidemisë së AIDS-it, Dajana bëri bujë duke i shtrënguar dorën një pacienti me AIDS pa doreza, gjatë hapjes së një reparti të posaçëm në Spitalin Middlesex. Me atë shtrëngim duarsh, ajo rrëzoi bindjen e gabuar se virusi HIV mund të përhapej përmes prekjes, duke ndihmuar në luftimin e keqinformimit dhe në uljen e stigmës që rrethonte AIDS-in.
6. E vetme përpara TaxhMahalit, 1992
Në vitin 1992, Dajana nxiti spekulimet për problemet në martesën e saj duke pozuar e vetme përpara Taxh Mahalit, mauzoleut të ndërtuar nga perandori mogul Shah Jahan si simbol i dashurisë së përjetshme për gruan e tij, ndërsa Çarls merrte pjesë në takime biznesi në Nju Delhi. Kur një gazetar e pyeti Dajanën se çfarë përshtypjeje i kishte lënë monumenti, ajo u përgjigj: “Ishte një përvojë magjepsëse, shumë shëruese.” Ajo nuk pranoi të jepte më shumë shpjegime dhe i tha gazetarit: “Gjeje vetë se çfarë dua të them.” Dhjetë muaj më vonë, Çarls dhe Dajana njoftuan ndarjen.
7. Me Uilliamin dhe Herrin në Thorpe Park, 1993
Vetëm pak muaj pas ndarjes së shumëpërfolur nga Çarls, Dajana i mori djemtë e saj, Uilliamin dhe Herrin, për një vizitë në Thorpe Park, një park argëtimi jashtë Londrës. Ajo nuk pranoi trajtim të veçantë dhe zgjodhi të priste në radhë për lodrat, duke treguar përpjekjen e saj për t’u dhënë djemve një fëmijëri sa më “normale”. Gëzimi në fytyrat e Dajanës dhe djemve të saj, teksa u lagën tërësisht në atraksionin Logger’sLeap, tregonte qasjen e saj të drejtpërdrejtë dhe aktive si nënë.
8. Duke u shërbyer refugjatëve në Zimbabve, 1993
Puna humanitare e Dajanës i dha asaj nofkën “princesha e popullit”. Kjo fotografi e vitit 1993, ku ajo u shërben ushqim fëmijëve të zhvendosur në Zimbabve gjatë një aktiviteti të Kryqit të Kuq, pasqyron empatinë, përulësinë dhe gatishmërinë e saj për të komunikuar drejtpërdrejt me njerëzit. Ajo e përdori ndikimin e saj global për të tërhequr vëmendjen ndaj kauzave që besonte dhe u përfshi personalisht në përpjekjet humanitare, duke i dhënë një shembull të ri shërbimit publik nga një anëtar i familjes mbretërore.
9. “Fustani i hakmarrjes”, qershor 1994
Me 29 qershor 1994, Princeshë Dajana mbërriti në një mbrëmje gala në Galerinë Serpentine me një fustan të zi, të ngushtë pas trupit dhe me shpatullat e zbuluara, që theksonte figurën e saj të famshme. Fustani provokues i stilistes Christina Stambolian u bë i njohur si “fustani i hakmarrjes”, sepse Dajana e veshi pikërisht në mbrëmjen kur bashkëshorti i saj i ndarë pranoi në një intervistë televizive se kishte pasur një lidhje jashtëmartesore.
10. Duke ecur nëpër një fushë të minuar në Angola, janar 1997
Në vitin 1997, Dajana bashkëpunoi me organizatën HALO dhe Kryqin e Kuq Britanik dhe udhëtoi drejt Angolës, ku u fotografua duke kaluar nëpër një fushë të minuar e pajisur me veshje mbrojtëse. Ajo përdori famën e saj për të tërhequr vëmendjen ndaj rrezikut që minat tokësore u paraqesin civilëve, edhe shumë vite pas përfundimit të luftërave. Vizita e saj, e ndjekur gjerësisht nga mediat, ndihmoi në krijimin e mbështetjes që çoi drejt Konventës për Ndalimin e Minave Kundër Personelit, ose Traktatit të Otavës, një marrëveshje ndërkombëtare që ndalon përdorimin, magazinimin, prodhimin dhe transferimin e minave kundër personelit.
