Lionel Richie, 77 vjeç, aktualisht ndodhet i shtruar në repartin e terapisë intensive të një spitali në St. Louis. Këngëtari raportohet se ka shkuar vetë në spital pas performancës së tij të shtunën e kaluar, më 29 gusht, në “The Muny”, në Forest Park.
Sipas raportimeve të TMZ, shtrimi në spital është bërë për të kryer disa ekzaminime, pasi dyshohet se këngëtari mund të ketë pësuar dehidratim.
Gjendja e keqe gjatë koncertit
Disa spektatorë të pranishëm në koncert kanë treguar se e kishin vënë re Lionel Richien në vështirësi drejt fundit të shfaqjes. Gjatë këngës së fundit, të paharrueshmes “All Night Long”, këngëtari thuhet se u ka kërkuar bashkëpunëtorëve t’i sillnin një karrige, në mënyrë që të ulej dhe të mund të vazhdonte performancën.
Si është Lionel Richie?
Vendimi për t’iu nënshtruar kontrolleve mjekësore menjëherë pas koncertit raportohet se është marrë vetëm si masë paraprake.
Gjendja e tij shëndetësore duket se nuk është alarmante dhe, sipas informacioneve të deritanishme, ekziston mundësia që Richie të dalë nga spitali brenda orëve të ardhshme. Megjithatë, deri tani nuk ka pasur një komunikim zyrtar për gjendjen e tij.
Një episod i ngjashëm në Minnesota
Ky nuk është incidenti i parë i këtij lloji për këngëtarin amerikan. Një episod i ngjashëm ndodhi në qershor, kur Richie u shtrua urgjentisht në spital pasi nuk u ndie mirë gjatë një koncerti në St. Paul, Minnesota.
Në atë rast, organizatorët ndërprenë shfaqjen ndërsa mjekët ndihmuan këngëtarin në prapaskenë, përpara se ai të transportohej me ambulancë në spital.
Në atë moment, Richie u kishte thënë fansave se ndihej “i trullosur” dhe “i çuditshëm”.
Deri tani, përfaqësuesit e artistit nuk kanë bërë asnjë deklaratë zyrtare lidhur me gjendjen e tij.
Nëse nuk do të ketë ndryshime në axhendë, rikthimi i Lionel Richies në skenë pritet në fund të këtij muaji, me një seri koncertesh të planifikuara në San Francisco, Chicago, Thackerville, Columbus, Las Vegas dhe São Paulo.
