Lajme

Sherri mes dy tifozërive në “Rrugën e Kombit”, arrestohen 8 tifozë dhe procedohen 20 të tjerë (DETAJET)

Ditën e djeshme një sherr i madh ka ndodhur në Reps mes tifozëve të Vllanisë dhe Tiranës. Përplasja e tyre ka nisur në “Rrugën e Kombit”, teksa dy tifozeritë kanë përdorur ndaj njëra – tjetrës shkopinj dhe sente të forta.

Nga kjo përplasje ka pasur të lënduar, ku 5 tifozë kanë pësuar edhe fraktura dhe është dashur të marrin mjekim.  Ndërkohë për shkak të kësaj përplasje ku ka pasur edhe dëme material, Policia ka shoqëruar 106 tifozë të të dyja ekipeve, ndërsa ka arrestuar 8 ndërsa 20 të tjerë janë proceduar penalisht.

Ajo që bie në sy nga të arrestuarit janë thuajse të gjithë të moshës 18-20 vjeç, teksa vetëm njëri prej tyre është 38-vjeç.

Njoftimi i policisë:

U konfliktuan fizikisht, në Rrugën e Kombit, dhe dëmtuan autobusët me të cilët udhëtonin, shoqërohen në ambientet e Policisë, 106 tifozë të ekipeve të futbollit “KF Tirana” dhe “KF Vllaznia”.

Prej tyre, vihen në pranga 8 tifozë dhe procedohen penalisht 20 të tjerë.

Shërbimet e Drejtorisë Vendore të Policisë Lezhë dhe ato të komisariateve në varësi të saj, sapo janë njoftuar se në Rrugën e Kombit, tifozët e 2 skuadrave të futbollit në vendin tonë, po konfliktoheshin fizikisht, kanë organizuar punën dhe kanë mbërritur menjëherë në vendngjarje, ku kanë bërë të mundur identifikimin dhe shoqërimin në ambientet e Policisë të 106 tifozëve (nga të dyja ekipet) të përfshirë në konflikt.

Në vijim të veprimeve procedurale për paligjshmëritë e kryera (konflikt fizik dhe dëmtim të autubusëve me të cilët udhëtonin), u arrestuan në flagrancë shtetasit: K. X., 20 vjeç, K. Z.,18 vjeç, R. M., 18 vjeç, I. A., 18 vjeç, K. D., 38 vjeç, R. L., 18 vjeç, F. K., 18 vjeç dhe F. Sh., 20 vjeç.

Gjithashtu, janë referuar materialet në Prokurori ku nisi procedimi në gjendje të lirë për 20 tifozë të tjerë, nga të dyja ekipet.

Ndërkaq, tifozët e tjerë të shoqëruar, në përfundim të veprimeve procedurale, janë lënë të lirë.

Materialet procedurale i kaluan Prokurorisë pranë Gjykatës së Shkalles së Parë të Juridiksionit të Përgjithshëm Lezhë, për veprime të mëtejshme, për veprat penale “Plagosja e lehtë me dashje”, “Prishja e qetësisë publike” dhe “Shkaterrimi i pronës”, të kryera në bashkëpunim.