Të dalësh me kolegët/et për një gotë pas orarit të punës është një mënyrë e mirë për të mbushur kohën e lirë. Por, ndoshta miqtë, familjarët ose kolegët kanë një angazhim tjetër, do udhëtojnë larg qytetit, kanë takim të rastit dhe plot arsye të tjera…Praktikisht ju mbeteni vetëm! Çfarë mund të bëjë një njeri vetëm që të kënaqet? Kjo pyetje duket sa zhgënjyese, aq edhe e vështirë për t’u pranuar, por ndodh që njerëzit të dalin në takime me veten dhe këtu s’ka asgjë për t’u habitur. Ja tetë aktivitete që mund të bëni për të kënaqur veten, por pa u ndjerë të vetmuar…
Bëni një shëtitje në natyrë
Të ecësh me ritmin e vetes, në një vend të ri që ju nuk e keni shkelur më parë është sa argëtuese, aq edhe e realizueshme. Ti nuk shqetësohesh për t’u përshtatur me shijet e shokëve apo kolegëve, ecën me hapin tënd, ndërkohë që dëgjon një podkast ose një libër audio në kufje.
Nëse nuk ju pëlqejnë filmat në kinema apo teatri, bashkojuni festave artistike
Vetëm mendimi i të qëndruarit ulur, vetëm në një sallë kinemaje ku të gjithë njohin njëri-tjetrin duket e papranueshme. Çifte, miq, kolegë që qeshin me batutat e filmave apo komentojnë çdo sekuencë filmi, ndërsa ju jeni vetëm nuk është një ide edhe aq argëtuese. Ajo që mund të bëni është t’i bashkoheni mbrëmjeve ku ka më shumë njerëz që pinë një gotë apo marrin një kafe përpara se të futen në kinema apo teatër. Mund të njihni njerëz të rinj.
Pijeni kafenë në një vend të lezetshëm
Nga të gjitha aktivitetet e dedikuara për veten, ky ndoshta është opsioni më i lehtë dhe i pranueshëm nga të gjithë. Një kafe e shijshme, në një vend të bukur, me pak muzikë të qetë në sfond është një përvojë e mirë.
Regjistrohuni në një aktivitet sportiv
Palestër, joga, pilates apo not, aktivitetet që mund të zgjidhni për të frekuentuar janë të shumta. Përveç shërbimit të mirë që i bëni vetes, ju investoni në linjat trupore dhe mirëqenien e përgjithshme shpirtërore.
Përkëdheleni veten me disa seanca SPA-je
Një seancë masazhi me gurë vullkanik, banjo turke apo dush relaksues mund të jenë vetëm disa nga shërbimet e mira që i bëni vetes. Ndaj, mos u mendoni gjatë përpara se të paguani disa seanca në një qendër SPA-je.
Përgatisni një vakt super të shijshëm
Ngrënia jashtë nuk është kusht që ju doemos të kënaqni shqisat tuaja të të shijuarit. Ndaj, ka një mënyrë për të përballuar të jetuarit vetëm, ju mund të gatuani diçka të thjeshtë dhe të shpejtë, pse jo një ëmbëlsirë të shijshme. Ideja është të argëtoheni teksa gatuani, e në fund shijoni rezultatet e përkushtimit në kuzhinë vetëm për vete.
Dilni për një koktej
Të ulesh vetëm në bar dhe të pish një margarita nuk duket një ide kaq e bukur, por ju mund ta bëni nëse nuk jeni të frikësuar nga njohjet e reja apo bisedat me të panjohurit në një bar.
Bëni blerje
T’i dedikosh vetes një pasdite duke kaluar nga dyqani në dyqan është një aktivitet zbavitës që mund ta bësh vetëm. Po, kjo është e mundur! Ti mund të dalësh nga dhoma e provës me veshjet e preferuara në krahë, pa pasur nevojën e një miratimi nga ana e partnerit apo miqve të tu.
