Sot shënohet 1 Qershori, Dita Ndërkombëtare e Fëmijëve, një datë që i kushtohet promovimit dhe mbrojtjes së të drejtave të fëmijëve, si dhe përmirësimit të mirëqenies së tyre.
Kjo ditë ka një histori të lidhur ngushtë me nismat ndërkombëtare për mbrojtjen e fëmijëve, të cilat u forcuan pas miratimit të Deklaratës për të Drejtat e Fëmijëve në vitin 1959 dhe më vonë Konventës së OKB-së për të Drejtat e Fëmijës në vitin 1989.
Megjithatë, në nivel global, sfidat mbeten ende të mëdha. Miliona fëmijë nuk kanë qasje në arsim, ndërsa shumë të tjerë përballen me varfëri dhe kushte të vështira jetese. Gjithashtu, një numër i madh vajzash përjetojnë martesë të hershme, fenomen që dëmton të drejtat dhe zhvillimin e tyre.
Këto të dhëna tregojnë se, pavarësisht përparimeve të bëra, nevojitet ende punë dhe angazhim i vazhdueshëm për të siguruar një të ardhme më të mirë dhe më të sigurt për çdo fëmijë.
Me rastin e 1 Qershorit, Komuna e Prishtinës në bashkëpunim me ETEA organizojnë aktivitetin publik me titull: “Përtej festës: Flasim për sigurinë e fëmijëve në shkolla”.
