Nga kujtimet e fëmijërisë në Kosovë te një atelie e re në zemër të St. Gallenit, historia e Teuta Bllaca – Jasharit është një rrëfim për artin, familjen, diasporën dhe fuqinë për ta kthyer një pasion të vjetër në një hapësirë që bashkon njerëzit.
Ka ëndrra që lindin në fëmijëri dhe presin vite për të gjetur formën e tyre. Për Teuta Bllaca – Jasharin, ajo formë tashmë ka një emër: TeutasKunst – Atelier Kunst & Inspiration.
E lindur dhe e rritur në Kosovë, me rrënjë në Suharekë dhe në fshatin Bllacë, Teuta e kujton fëmijërinë si periudhën kur ngjyrat, vizatimi dhe natyra nisën të bëheshin pjesë e pandashme e botës së saj. Ishte pjesë e grupit rinor të piktorëve të qytetit, një përvojë që do të mbetej e gjallë edhe shumë vite më vonë. Sot, pas një rrugëtimi profesional dhe personal në Zvicër, ajo e sheh artin si një urë mes kujtimeve, kulturave dhe njerëzve.
Teuta është artiste, ilustruese dhe pedagoge. Është gjithashtu nënë e katër fëmijëve dhe prej vitesh punon me fëmijë, duke e lidhur edukimin me kreativitetin. Angazhimi i saj në bibliotekat e fëmijëve, në tregimin e përrallave e tregimeve në shqip dhe në projekte të Institutit të Fëmijëve në Zürich, i ka dhënë një dimension tjetër marrëdhënies së saj me artin: atë të komunikimit dhe të bashkimit. Këto përvoja sot takohen në atelierin e saj.
Nga pasioni te një hapësirë reale
TeutasKunst nuk lindi si një plan klasik biznesi. Fillimisht ishte pasioni. Më pas erdhën interesimi i njerëzve, porositë, ilustrimet dhe projektet artistike. Me kalimin e kohës, ideja filloi të marrë formë.
Mbështetja e njerëzve përreth saj, e kolegëve, miqve, fqinjëve dhe profesionistëve të artit në St. Gallen, i dha Teutës kurajën për ta kthyer këtë pasion në një projekt konkret.
Në gusht të vitit 2026, ajo hapi dyert e atelierit të saj në Rorschacherstrasse 109, St. Gallen.
Por TeutasKunst synon të jetë më shumë sesa një studio ku ekspozohen ose krijohen vepra arti.
Është konceptuar si një hapësirë për art, ide, frymëzim dhe takim.
Në të realizohen ilustrime dhe punime të personalizuara, piktura, vizatime, portrete, dekorime, motive murale dhe tabela artistike për shtëpi, restorante, biznese dhe ambiente të ndryshme. Në të njëjtën kohë, atelier-i hapet edhe për fëmijë, të rinj dhe të rritur përmes workshop-eve kreative, aperove artistike, ditëlindjeve, aktiviteteve në grup dhe eventeve private.
Në qendër të këtij koncepti qëndron një bindje e thjeshtë e Teutës: kreativiteti nuk është privilegj i atyre që dinë të vizatojnë; ai ekziston te secili njeri.
Një hapje që u kthye në festë komunitare
Më 16 gusht 2026, TeutasKunst u prezantua zyrtarisht para publikut. Për Teutën, ajo ditë ishte shumë më tepër se inaugurimi i një biznesi.
Ishte një moment ku u takuan njerëzit që kishin qenë pjesë e rrugëtimit të saj: familja, miqtë, kolegët, fqinjët, bashkëpunëtorët dhe mbështetësit.
Mes të ftuarve ishin edhe Presidenti i Parlamentit të Qytetit të St. Gallenit, Jeyakumar Thurairajah, fotografi me aktivitet ndërkombëtar me bazë në St. Gallen, Augustin Saleem, si dhe kompozitori dhe filozofi Dr. Christoph Schnell.
Muzika, arti, bisedat dhe apero-ja krijuan një atmosferë ku dallimet kulturore u kthyen në pasuri. Njerëz me prejardhje, profesione dhe gjuhë të ndryshme u mblodhën rreth një ideje të përbashkët: artit si hapësirë takimi.
Dhe pikërisht kjo është ajo që Teuta dëshiron të ndërtojë.
Mes dy kulturave, një identitet
Të ndërtosh një rrugë profesionale në diasporë nuk është gjithmonë e lehtë. Përveç profesionit, duhet të mësosh një gjuhë të re, një sistem të ri dhe një mënyrë tjetër jetese, ndërsa njëkohësisht përpiqesh të ruash lidhjen me vendin prej nga vjen. Teuta nuk e sheh këtë si një zgjedhje mes dy identiteteve. Përkundrazi, ajo e sheh përvojën e saj shqiptare dhe jetën në Zvicër si dy pjesë që mund të plotësojnë njëra-tjetrën.
Në këtë rrugëtim, ajo veçon mbështetjen e shumë njerëzve, institucioneve, kolegëve dhe bashkëpunëtorëve. Një rol të veçantë në realizimin e atelierit pati edhe Franco Ventrici dhe familja e tij, të cilët i mundësuan hapësirën ku ideja mori formë – një lokal historik që daton nga viti 1470, në ndërtesën me rrënjë të hershme të Gasthaus zum Hirschen. Për Teutën, kjo është dëshmi se një histori suksesi rrallëherë ndërtohet vetëm.
Arti si gjuhë që nuk ka nevojë për përkthim
Ndoshta pikërisht përvoja e saj me fëmijët e ka bërë Teutën ta shohë artin në këtë mënyrë. Në punën me fëmijët dhe në bibliotekë, ajo ka parë se një tregim, një libër apo një vizatim mund të krijojë komunikim edhe kur njerëzit nuk flasin të njëjtën gjuhë. E njëjta filozofi është bartur në atelie. Aty nuk ka rëndësi nëse dikush është fillestar apo artist me përvojë. Nuk kërkohet perfeksioni. Kërkohet dëshira për të provuar, për të krijuar dhe për të shprehur diçka personale.
Motoja e TeutasKunst e përmbledh këtë filozofi:
“Kreativiteti i lidh njerëzit. Çdo ide meriton hapësirë.”
Një ëndërr që vazhdon të rritet…
Mes familjes, pedagogjisë, artit, studimeve dhe angazhimeve të shumta, Teuta e pranon se balanca nuk është gjithmonë perfekte. Por pikërisht kjo e bën rrëfimin e saj më njerëzor.
Ajo është nënë e katër fëmijëve dhe dëshiron që ata të shohin tek ajo një shembull të thjeshtë: se ëndrrat nuk kanë afat dhe se gjithmonë mund të mësosh, të krijosh e të nisësh diçka të re.
Sot, kur hap derën e atelierit, Teuta nuk sheh vetëm pikturat dhe punimet e saj. Ajo sheh fëmijën që dikur ëndërronte në Kosovë, gruan që ndërtoi jetën në diasporë, nënën, pedagogen, artisten dhe të gjithë njerëzit që e kanë shoqëruar në këtë rrugëtim.
View this post on Instagram
Një hapësirë ku një ide mund të marrë formë, një fëmijë mund të zbulojë talentin e tij, një i rritur mund të gjejë sërish kënaqësinë e krijimit dhe njerëz të ndryshëm mund të takohen përmes një gjuhe që nuk ka nevojë për përkthim.
https://www.kosovarja-ks.com/wp-content/uploads/2026/08/AQPre_Qs_NpefoIzqBpPu3VXAjLruX2vI84JTamVfauJUX4cL2Oss4uiPgrG5wpHlMU7NLtpx9gOf3iHU-9QEspS6oc-pawm4qkaiUyINQ.mp4
TeutasKunst – Atelier Kunst & Inspiration
Raum für Kunst, Ideen und Inspiration
Rorschacherstrasse 109, 9000 St. Gallen, Zvicërwww.teutas-kunst.ch | Instagram: @teutaskunst
