Në një takim trepalësh të zhvilluar ndërmjet institucioneve të Avokatit të Popullit të Kosovës, Shqipërisë dhe Maqedonisë së Veriut, është theksuar nevoja për thellimin e bashkëpunimit rajonal dhe krijimin e një partneriteti të qëndrueshëm në funksion të mbrojtjes së të drejtave të njeriut.
Takimi u fokusua në shkëmbimin e përvojave institucionale, trajtimin e rasteve ndërkufitare dhe forcimin e mekanizmave të bashkëpunimit në çështje që prekin drejtpërdrejt qytetarët e tri vendeve.
Avokati i Popullit në Kosovë, Naim Qelaj, theksoi rëndësinë e shkëmbimit të përvojave dhe koordinimit ndërinstitucional.
Ai u shpreh se bashkëpunimi rajonal mundëson trajtim më efikas të rasteve dhe adresim më të shpejtë të sfidave që lidhen me të drejtat e njeriut, veçanërisht në kontekstin ndërkufitar.
“Shkëmbimi i përvojave tregon ku është rajoni, jo vetëm ku është vendi respektiv dhe mundëson marrjen e veprimeve konkrete në adresimin e çështjeve prioritare për të drejtat e njeriut. Bashkëpunimi nënkupton edhe ofrimin e shërbimeve të ndërsjella në situata kur qytetarët përballen me vështirësi në shtetet respektive”, tha Qelaj.
Ai shtoi se ndër çështjet kryesore të diskutuara në takimin trepalësh ishin problemet me dokumentacionin, të drejtat civile dhe mundësia e krijimit të mekanizmave të përbashkët të monitorimit të zbatimit të marrëveshjeve shtetërore. Po ashtu, sipas tij, u dakorduan që vëmendje e veçantë duhet t’i kushtohet edhe shërbimeve shëndetësore për qytetarët në lëvizje mes shteteve.
Nga ana e tij, Endrit Shabani, Avokat i Popullit në Shqipëri theksoi kufizimet territoriale të institucioneve dhe nevojën për bashkëpunim të ngushtë në trajtimin e rasteve ndërkufitare.
Ai solli shembuj të rasteve kur qytetarët e Kosovës marrin shërbime në Shqipëri dhe përballen me vështirësi institucionale, duke nënvizuar se koordinimi mes zyrave të Avokatit të Popullit është thelbësor për mbrojtjen efektive të të drejtave të tyre.
