Një grup ndërkombëtar shkencëtarësh detarë ka zbuluar një kërpudhë të quajtur Parengyodontium album në Vorbullën e Mbeturinave të Paqësorit të Veriut, e njohur për aftësinë e saj për të copëtuar plastikën, sipas një studimi të botuar në revistën Science of the Total Environment.
Kjo kërpudhë, e gjetur në mesin e mikrobeve në grumbullimin e plastikës lundruese, ka rezultuar efikase në copëtimin e polietilenit, plastikës më të zakonshme në produktet e konsumit, veçanërisht kur ekspozohet ndaj dritës ultravjollcë (UV).
Studimi, i udhëhequr nga Annika Vaksmaa e Institutit Mbretëror të Holandës për Kërkimet e Detit (NIOZ), zbulon se rrezet UV jo vetëm që shkatërrojnë mekanikisht plastikën, por edhe lehtësojnë degradimin biologjik nga kërpudhat detare. Megjithëse kërpudhat e degradojnë plastikën me një normë prej 0.05% në ditë në një cikël 9-ditor, zbulimi i saj hap perspektiva të reja në luftën kundër ndotjes plastike.
Pavarësisht këtij përparimi, shkencëtarët paralajmërojnë se reduktimi i përdorimit të plastikës së disponueshme mbetet vendimtar. Oqeanet përballen me një mbingopje të ndotësve plastikë dhe mbledhja e plastikës me rrjeta të mëdha është e kushtueshme dhe joefikase. Prandaj, megjithëse zbulimi i kërpudhave është premtues, ai nuk paraqet një zgjidhje përfundimtare për krizën e ndotjes plastike./sport.es
