Grupi militant i Hamasit ka marrë një goditje të rëndë nga ushtria izraelite. Zëvendëskomandanti i krahut ushtarak, Marëan Issa është sulmuar nga ushtria izraelite.
Mediat ndërkombëtare dhe burime palestineze theksojnë se, zyrtari i tretë më i lartë në Gaza u plagos rëndë por pa dhënë detaje për fatin e tij. Forcat izraelite të mbrojtjes thanë se kanë vrarë 18 militantë të Hamasit natën e së shtunës në Rripin e Gazës.
Sipas Times of Izrael, militantët e Hamasit u vranë nga snajperat dhe nga sulmet ajrore. Hamasi bën të ditur se në 24 orët e fundit në Gaza janë vrarë 92 persona, duke e çuar numrin e përgjithshëm të vdekjeve në mbi 31 mijë.
Përpjekjet e dështuara të deritanishme për të siguruar një armëpushim të përkohshëm kanë krijuar krizën më të madhe humanitare të dekadës së fundit në Gaza.
Pak gjasa ka për armëpushime dhe pas mundësisë së rifillimit të bisedimeve mes Izraelit dhe Hamasit të hënën. Kjo pasi Izraeli tha ka planifikuar një ofensivë të re kundër bastionit të Hamasit në Rafah, qyteti i fundit relativisht i sigurt në Gaza. Kancelari gjerman Olaf Scholz, gjatë vizitës në Izrael, shprehu shqetësimin për një sulm në Rafah, duke thënë se ekzistonte rreziku që do të rezultonte në më shumë viktima civile.
Ndërsa këtë të dielë kryeministri izraelit, Benjamin Netanyahu ka thënë se aleatët e Izraelit kanë kujtesë të dobët në lidhje me sulmin e 7 tetorit që e kreu Hamasi, grupi i shpallur terrorist nga Shtetet e Bashkuara dhe Bashkimi Evropian.
Ai u zotua se forcat izraelite do ta vazhdojnë ofensivën ushtarake në Rripin e Gazës, me gjithë trysninë e madhe ndërkombëtare.
A ju ndihmoi ky artikull?PoJo
