Moderatori dhe këngëtari i njohur Ardit Gjebrea është paraqitur këtë të premte, 6 nëntor, në Prokurorinë e Posaçme (SPAK), ku është marrë në pyetje në cilësinë e dëshmitarit.
Gjebrea mbërriti në ambientet e institucionit rreth orës 10:00, ndërsa pas daljes nga SPAK konfirmoi për gazetarët se kishte dhënë shpjegime për një çështje që është ende nën hetim.
“Isha në cilësinë e dëshmitarit për një çështje që është sekret hetimor. Ishin miqësorë, edhe unë i ftova në emisionin tim! Edhe ata njerëz janë, më ftuan, i ftova”, u shpreh moderatori, duke e komentuar me humor takimin me prokurorët.
Megjithëse Gjebrea nuk e zbuloi dosjen për të cilën ishte thirrur, raportimet e fundit mediatike e lidhin paraqitjen e tij me hetimet ndaj kryebashkiakut të Tiranës, Erion Veliaj.
Sipas “Piranjat”, producenti është thirrur për të dhënë shpjegime lidhur me financimet që festivali “Kënga Magjike” ka përfituar nga Bashkia e Tiranës gjatë periudhës kur institucioni drejtohej nga Veliaj.
Bëhet fjalë për disa pagesa të kryera përmes shoqatës “Jon Music”, të cilat janë evidentuar në të dhënat e Thesarit të Shtetit, të publikuara në platformën Open Spending Data.
Sipas këtyre të dhënave, Bashkia e Tiranës ka kryer gjashtë pagesa për shoqatën në periudhën 2019–2022, me një vlerë totale prej 29,970,878 lekësh, ose afro 300 mijë euro me një kurs të përafërt prej 100 lekësh për euro.
Pagesa më e madhe rezulton të jetë kryer më 19 dhjetor 2022, kur Bashkia e Tiranës i ka kaluar shoqatës “Jon Music” shumën prej 8 milionë lekësh për organizimin e festivalit “Kënga Magjike 2022”.
Një tjetër pagesë prej 705,880 lekësh është kryer më 3 dhjetor 2021, ndërsa më 11 tetor të po atij viti shoqata ka përfituar edhe 6,289,998 lekë.
Financimet rezultojnë edhe gjatë vitit 2020. Më 3 shkurt, Bashkia e Tiranës ka transferuar 2,700,000 lekë, ndërsa më 31 janar të të njëjtit vit është kryer një tjetër pagesë prej 4,300,000 lekësh.
Pagesa më e hershme e përmendur në këto raportime daton më 29 janar 2019, kur shoqata “Jon Music” ka përfituar 7,975,000 lekë nga Bashkia e Tiranës.
Sipas raportimit të “Piranjat”, këto financime janë pjesë e çështjeve për të cilat Gjebrea është thirrur të japë shpjegime në Prokurorinë e Posaçme.
Edhe gazetari Elton Qyno ka raportuar se thirrja e moderatorit lidhet me kontratat sponsorizuese të lidhura me Bashkinë e Tiranës.
Megjithatë, SPAK nuk ka konfirmuar zyrtarisht se cilat prej pagesave apo kontratave janë objekt i pyetjeve drejtuar Gjebreas. Po ashtu, përfitimi i fondeve publike për organizimin e një aktiviteti kulturor nuk përbën në vetvete provë të një shkeljeje ligjore.
