Shifrat janë dramatike – më shumë se 60 përqind e fëmijëve në Gjermani nuk mund të notojnë në mënyrë të sigurt pas përfundimit të klasës së katërt. Një kontejner i lëvizshëm noti tani duhet të ndihmojë në zgjidhjen e këtij problemi.Martin Holzauze nga Shoqata Gjermane e Shpëtimit të Jetës (DLRG) tha në një intervistë me DW se “rreth 60 përqind e vajzave dhe djemve të shkollës në Gjermani nuk dinë të notojnë në mënyrë të sigurt kur mbarojnë shkollën fillore, domethënë klasën e katërt”.
Noti i sigurt në këtë rast do të thotë që fëmijët mund të notojnë për të paktën 15 minuta pa pushim. Përveç kësaj, ata duhet të jenë në gjendje të hidhen në ujë dhe të lundrojnë nën ujë për t’u konsideruar notarë të sigurt.Një statistikë tjetër shqetëson DLRG-në: numri i fëmijëve që, pas përfundimit të shkollës fillore katërvjeçare – nuk dinë fare të notojnë – është rritur nga dhjetë në 20 përqind.
Shifrat e publikuara nga DLRG janë të frikshme, por arsyet për këtë nuk janë të reja. Në vitet e fundit, gjithnjë e më shumë pishina janë mbyllur përgjithmonë, ndërsa të tjera janë gati për rehabilitim serioz – thjesht nuk ka para.
“Kapaciteti i pishinave në Gjermani është ulur ndjeshëm në dekadat e fundit”, konfirmon Holzause. Përveç kësaj, ka një mungesë serioze të trajnerëve të notit.
Jo të gjithë kanë mundësi të çojnë fëmijët e tyre në pishinë
Wolfgang Schmitz i shoqatës sportive në Düren dyshon se numrat e vërtetë janë në fakt shumë më të lartë. Schmitz dhe ekipi i tij janë marrë intensivisht me këtë temë gjatë tre viteve të fundit, dhe gjatë asaj kohe ai gjithashtu përjetoi se disa fëmijë nuk kishin as rroba banje apo peshqir. Është një situatë ekstreme në Gjermani.
Përshtypja e Schmitz-it konfirmohet nga të dhënat zyrtare: pothuajse gjysma e fëmijëve që nuk dinë të notojnë vijnë nga familje me të ardhura neto mujore më pak se 2,500 euro.
“Është dramatike”, thotë Holzauze, duke shtuar se udhëtimet në pishinë janë të shtrenjta dhe kurset e notit pas shkolle shpejt arrijnë çmimin e disa qindra eurove. Familjet më të varfra shpesh nuk mund ta përballojnë atë.
“Mobi” vjen në shpëtim
DLRG sheh një mundësi për një kthesë në mësimet e notit në shkollë.
“Mund t’i arrish të gjithë fëmijët atje, kështu që edhe më të vegjlit nga shtresat më të varfra do të kenë një shans për të mësuar të notojnë”, thotë Holzause.
Megjithatë, shkollat kanë edhe probleme infrastrukturore – ka shumë pak ambiente dhe staf profesional për t’u kujdesur për fëmijët.
Pikërisht këtu hyn në lojë projekti i përbashkët i Shoqatës Sportive Duren dhe bankës së kursimeve Sparkasse KölnBonn, e cila zhvilloi një kontejner të lëvizshëm për not. “Mobi” është menduar të instalohet dhe të përdoret kryesisht në oborret e shkollave.
Në një intervistë me DW, menaxherja e projektit “Mobi”, Verena van Gaten, thotë se përparësia e parë është të heqim qafe frikën nga uji, në mënyrë që fëmijët të përgatiten për një kurs të vërtetë noti.
Gjithçka që ju nevojitet – në një hapësirë të vogël
“Mobi” përbëhet nga tre kontejnerë, dhe pishina ka një sipërfaqe prej gati 40 metrash katrorë dhe ofron gjithçka që ka një pishinë “normale”.
Gero Wiesenhefer i Sparkasse KölnBonn i tha DW se ata kanë ngrohje nën dysheme, tualete, dushe dhe një sistem noti kundër rrymës. Këtyre duhet t’i shtohet një enë e posaçme për pajisjet.
“Jam i magjepsur nga ajo që mund të bëhet në një hapësirë kaq të vogël. E gjithë shkolla, nga klasa e parë deri në të katërtën, mund ta përdorë ‘Mobi’-n për tre muaj”, thotë ai.
Zhvillimi i “Mobi”-t zgjati rreth një vit dhe kushtoi rreth një milion euro. Kostot operative aktualisht janë rreth 500,000 euro në vit. Në total, ky projekt, i planifikuar fillimisht për pesë vjet, kushtoi rreth 3.5 milionë euro dhe financohet nga donacionet.
Kartat me figura ndihmojnë në komunikim
Menaxherja e projektit e ndjek “Mobi”-n edhe nga ana shkencore, kështu që ajo zhvilloi një sistem për t’u mësuar fëmijëve notin, pavarësisht barrierave gjuhësore, përmes lojës dhe motivimit.
“Me ndihmën e kartave me figura, ne arrijmë t’i arrijmë të gjithë fëmijët e çdo moshe”, thotë ajo.
Dhe kjo ide u prit me reagime të mëdha.”Ne bëjmë ushtrime dhe lojëra të ndryshme me fëmijët”, shpjegon mësuesja e notit Ksenia.
Ajo thekson se është e rëndësishme të përshtatemi me ritmin e fëmijëve për të arritur një rezultat pozitiv.
“Vërehet shpejt se fëmijët po kënaqen, janë të lumtur që hyjnë në ujë dhe e humbasin frikën”.
Rreth 500 deri në 600 fëmijë përdorin aktualisht “Mobi” çdo javë. Pavarësisht suksesit të tij, kontejneri ende nuk është një zëvendësim për një pishinë të madhe.
“Përvoja jonë tregon se fëmijët që kanë qenë me ne në një kontejner, dhe më pas janë zhvendosur në një pishinë të madhe, notojnë relativisht shpejt dhe shumë të sigurt”, thotë Wolfgang Schmitz dhe shton se duhet shumë kohë për të ndërtuar një pishinë të re dhe se deri atëherë mund të bëhet diçka.
“Nëse arrijmë të shpëtojmë të paktën një fëmijë nga mbytja gjatë asaj kohe, kemi bërë gjënë e duhur”, beson ai.
Sipas të dhënave nga Organizata Botërore e Shëndetësisë (OBSH), të paktën 20,000 njerëz mbyten në Evropë çdo vit, ndërsa në Gjermani në vitin 2024 ky numër ishte mbi 400.
