Një person ka pësuar lëndime trupore si pasojë e një aksidenti të trafikut që ka ndodhur të hënën pasdite në rrugën “Transiti i vjetër” në Prizren.
Në aksident, i cili është raportuar rreth orës 16:08, më 19 tetor 2026, janë përfshirë dy automjete. Përveç lëndimeve trupore, aksidenti ka shkaktuar edhe dëme materiale.
Lajmin për Tëvë1 e ka konfirmuar zëdhënësi i Policisë së Kosovës për rajonin e Prizrenit, Shaqir Bytyqi.
“Më datën 19.10.2026, rreth orës 16:08, është raportuar një aksident trafiku në mes të dy automjeteve, në rrugën ‘Transiti i vjetër’ në Prizren. Si pasojë e aksidentit, janë shkaktuar dëme materiale dhe së paku një person ka pësuar lëndime trupore”, deklaroi Bytyqi.
Ai bëri të ditur se njësitë policore kanë dalë në vendin e ngjarjes dhe kanë ndërmarrë veprimet e nevojshme hetimore për të sqaruar rrethanat dhe shkaqet e aksidentit.
Rrethanat e plota të aksidentit mbeten për t’u hetuar.
