Udhëtarët ajrorë janë të njohur me këtë situatë: stjuardesat qëndrojnë te dera e avionit dhe përshëndesin të gjithë pasagjerët teksa ata hipin në bord. Një gjest shërbimi dhe mirësjelljeje? Nga njëra anë, po. Por, nga ana tjetër, kjo është edhe një masë sigurie.
“Gjatë hipjes në avion, ekuipazhi i kushton vëmendje të veçantë sjelljes së pasagjerëve”, thotë Shoqata Federale e Industrisë Gjermane të Aviacionit (BDL). Kjo do të thotë se kushdo që shfaqet i dyshimtë ka të ngjarë të vëzhgohet pak më nga afër.
Nëse pasagjerët janë dukshëm nën ndikimin e alkoolit, sillen në mënyrë të papërshtatshme ose në një mënyrë që përbën rrezik për sigurinë, mund t’u refuzohet hipja në avion. E njëjta gjë vlen edhe nëse ata thjesht nuk u përmbahen udhëzimeve të ekuipazhit.
Lufthansa, kompania ajrore kryesore e Gjermanisë, thotë se kapiteni ka gjithmonë fjalën e fundit në vendime të tilla, në konsultim me personelin tokësor dhe përgjegjësin e kabinës, i cili është anëtari më i lartë në hierarkinë e ekuipazhit të kabinës.
Çfarë duhet të kenë parasysh pasagjerët
Udhëtarët duhet të jenë veçanërisht të kujdesshëm që të mos e teprojnë me konsumimin e alkoolit përpara nisjes. Ekuipazhi i kabinës i kushton vëmendje të madhe kësaj çështjeje, duke pasur parasysh se alkooli ka një efekt edhe më të fortë në lartësi, thotë BDL.
Nëse dëshironi të udhëtoni me avion, është më mirë të mos paraqiteni për të hipur në bord në gjendje të dehur rëndë. Edhe nëse jeni dukshëm nën ndikimin e drogës ose të medikamenteve, mund të konsideroheni të papërshtatshëm për të fluturuar. E njëjta gjë vlen edhe nëse shfaqni simptoma akute të një sëmundjeje.
Mund të hasni gjithashtu vështirësi nëse mbani me vete mallra të rrezikshme, siç janë bateritë e jashtme (power bank) me kapacitet të lartë.
Ekzistojnë rregulla për hipjen në avion
Linjat ajrore zbatojnë kërkesat ligjore gjatë procesit të hipjes së pasagjerëve në avion, thotë Lufthansa. Zonat pranë dyerve duhet të jenë gjithmonë të mbikëqyrura nga personeli, në mënyrë që ky i fundit të mund të reagojë në rast të një emergjence të mundshme. Vetëm pasi të gjithë pasagjerët të jenë ulur në vendet e tyre dhe korridoret të jenë të lira, ekuipazhi i kabinës lejohet të largohet nga zonat pranë dyerve. Ky rregull siguron gjithashtu që, në rast emergjence, anëtarët e ekuipazhit të mund të arrijnë te dyert pa pengesa, në çdo moment.
Megjithatë, procesi i hipjes në avion zakonisht zhvillohet pa probleme. Kjo do të thotë se anëtarët e ekuipazhit mund të përqendrohen te ndihma që u ofrojnë pasagjerëve, qoftë duke i ndihmuar të gjejnë vendet e tyre, qoftë duke iu përgjigjur pyetjeve rreth bagazheve të dorës./DPA News
