Ndarja e Ana Ivanoviq dhe Bastian Schweinsteiger, dikur një prej çifteve më të njohura të botës së sportit, duket se ende nuk ka marrë fund në aspektin ligjor.
Sipas raportimeve të mediave rajonale dhe gjermane, ish-bashkëshortët dyshohet se nuk kanë arritur marrëveshje për një pjesë të pasurisë së tyre me vlerë të konsiderueshme, ndërsa një prej pikave më të debatueshme është një vilë luksoze në Mallorca.
Ivanoviq dhe Schweinsteiger u ndanë pas nëntë vitesh martesë. Në korrik të vitit 2025, avokati i ish-tenistes, Christian Schertz, konfirmoi ndarjen e tyre, duke deklaruar se arsyeja ishin ‘dallimet e pakapërcyeshme’.
Më pas u shfaqën raportime të ndryshme lidhur me statusin përfundimtar të divorcit. Ndërsa disa media kishin raportuar vitin e kaluar se martesa kishte përfunduar zyrtarisht dhe se çifti kishte arritur marrëveshje për ndarjen e pasurisë, raportimet më të fundit pretendojnë se mosmarrëveshjet ligjore që lidhen me ndarjen e tyre ende vazhdojnë.
Në qendër të raportimeve të reja është një vilë luksoze në Mallorca, ku Ivanoviq jeton së bashku me fëmijët e saj. Sipas raportimeve të mëhershme, prona i përkiste ish-tenistes edhe para martesës, ndërsa gjatë jetës së përbashkët çifti kishte investuar në rinovimin e saj.
Vlera e vilës është vlerësuar ndryshe nga mediat, me shifrat që variojnë nga më shumë se katër milionë deri në rreth 6.5 milionë euro.
Sipas ‘Slobodna Dalmacija’, Schweinsteiger tani pretendohet se kërkon një pjesë të vlerës së vilës, duke argumentuar se gjatë martesës kishte investuar në rinovimin e pronës. Sipas të njëjtit burim, Ivanoviq nuk është dakord me këtë kërkesë.
Çifti dyshohet se kishte rregulluar çështjet e pasurisë edhe para martesës, në mënyrë që secili të ruante pronat dhe pasuritë që zotëronte para martesës, ndërsa pasuria e krijuar së bashku do të trajtohej veçmas.
Në këtë histori është përmendur sërish edhe Silva Kapitanova, me të cilën Schweinsteiger filloi të lidhej nga mediat pas ndarjes së tij nga Ivanoviq.
Disa media rajonale tani pretendojnë se Kapitanova ka ndikuar në vendimin e Schweinsteiger për të këmbëngulur në kërkesat e tij lidhur me pasurinë. Megjithatë, për këto pretendime nuk ka konfirmim publik nga Schweinsteiger apo Kapitanova, ndaj ato mbeten vetëm raportime mediatike.
Po ashtu, Kapitanova nuk është përmendur në asnjë konfirmim zyrtar të ndarjes së Ivanoviq dhe Schweinsteiger si arsye për përfundimin e martesës së tyre. Zyrtarisht, si arsye janë përmendur ‘dallimet e pakapërcyeshme’.
Gjatë gati një dekade të jetës së përbashkët, Ivanoviq dhe Schweinsteiger kanë pasur në pronësi pasuri të paluajtshme me vlerë të konsiderueshme, si dhe asete të tjera.
Në raportimet e mëhershme është përmendur një shtëpi në Westendorf të Austrisë, me vlerë rreth 3.5 milionë euro, si dhe një jaht që është vlerësuar në rreth 400 mijë euro.
Pikërisht për shkak të pretendimeve të ndryshme lidhur me atë se cilat pasuri i përkisnin secilit para martesës, cilat janë krijuar së bashku dhe sa ka investuar secili në pronat e caktuara, detajet rreth ndarjes së pasurisë së ish-çiftit kanë tërhequr prej muajsh vëmendjen e mediave evropiane.
Ana Ivanoviq dhe Bastian Schweinsteiger u martuan në Venecia në vitin 2016, pasi kishin nisur lidhjen dy vite më parë. Gjatë martesës, ata u bënë prindër të tre fëmijëve.
