Tom Cruise u përpoq të sillej si një zotëri me Kate Middleton, por një gjest i tij gjatë premierës së filmit të ri “Digger” në Londër rezultoi të ishte në kundërshtim me një rregull të protokollit mbretëror.
Më 22 shtator, Princi William dhe Kate Middleton morën pjesë në premierën e filmit të ri të Tom Cruise në Leicester Square, ku aktori i “Top Gun” u shfaq krah çiftit gjatë mbrëmjes. Të tre u fotografuan duke biseduar dhe duke qeshur, ndërsa në event ishte i pranishëm edhe David Beckham, si dhe regjisori Alejandro González Inárritu.
Por një moment i vogël gjatë zbritjes së shkallëve të tapetit të kuq tërhoqi vëmendjen. Cruise zgjati dorën drejt Kate për ta ndihmuar të zbriste shkallët dhe princesha e pranoi gjestin pa hezitim.
Në pamje të parë, bëhet fjalë thjesht për një sjellje të sjellshme, por sipas protokollit mbretëror, njerëzit zakonisht nuk duhet të nisin kontakt fizik me një anëtar të familjes mbretërore, përveç rasteve kur vetë ai ose ajo e ofron fillimisht.
Kështu, edhe pse gjesti i Cruise duket se kishte vetëm qëllim ta ndihmonte Kate, teknikisht ai shkeli një nga rregullat e pashkruara të sjelljes me familjen mbretërore. Kate, nga ana tjetër, e pranoi dorën e aktorit dhe vazhdoi të zbriste shkallët.
Ky nuk është takimi i parë i Kate dhe William me Tom Cruise në një premierë. Në vitin 2022, çifti mori pjesë në premierën londineze të “Top Gun: Maverick”, ku edhe atëherë Cruise i shoqëroi gjatë zbritjes në tapetin e kuq.
Në premierën e këtij viti, Kate tërhoqi vëmendjen edhe me pamjen e saj. Princesha veshi një fustan lejla të Jenny Packham, me një siluetë të gjerë që binte deri në tokë dhe një dekolte të theksuar. Ajo e kombinoi veshjen me një varëse me perla dhe ametist, si dhe vathë të varur, ndërsa flokët i kishte mbledhur pjesërisht pas kokës./Anabel
