Nënkryetari i Lidhjes Demokratike të Kosovës, Lutfi Haziri ka reaguar ndaj zhvillimeve në sallën plenare të Kuvendit, duke kritikuar Lëvizjen Vetëvendosje për, siç ka thënë ai, shndërrimin e seancës në “zallamahi”.
Haziri ka deklaruar se salla plenare e Kuvendit nuk duhet të shndërrohet në hapësirë ku “vlojnë sharjet e thirrjet për vrasje”.
“Ne nuk duhet të ballafaqohemi me mërgimtarët, por me ata që e mbajnë derën e mbyllun për deputetë dhe me ata hapin dyer për sharje e thirrje për vrasje!”, ka shkruar Haziri.
Ai ka theksuar se LDK-ja, sipas tij, nuk kërkon poste apo përfitime politike, por vetëm një rol në proceset institucionale.
“Gjithçka për Republikën. LDK nuk kërkon asgjë pos rolit të saj shtetnor për konstituimin e Kuvendit dhe zgjedhjen e Presidentit e Qeverisë”, ka deklaruar ai.
Haziri ka rikujtuar gjithashtu qëndrimin e LDK-së kundër asaj që e quan “mendësi parti-shtet”, duke thënë se kjo qasje është rrënuar shumë kohë më parë.
“Kemi qenë përherë besë e shpresë për Republikën”, ka shkruar ai.
Sipas Hazirit, pas dy vitesh LDK-ja i është rikthyer pragmatizmit, të cilin ai e cilëson si një prej karakteristikave tradicionale të kësaj partie.
“Kur ofrohesh për bashkëpunim e nuk të pranohet, atëherë jemi shtyrë në shkaktim të proceseve të reja. Proceseve politike e jo zgjedhore”, ka përfunduar Haziri./teve1.info/
