Edicioni i pestë i “Big Brother VIP Kosova” ka nisur zyrtarisht, ndërsa tashmë janë zbuluar edhe 21 personazhet që do të jenë pjesë e garës për çmimin e madh.
Ndryshe nga sezonet e kaluara, këtë herë produksioni vendosi ta niste lojën një ditë përpara premierës zyrtare. Të enjten, më 29 tetor, në shtëpi hynë tre banorët e parë: Arlinda Morina, Antoneta Koçi dhe reperi Nichi.
Ndërkohë, mbrëmjen e së premtes, më 30 tetor, gjatë spektaklit të parë zyrtar, atyre iu bashkuan edhe 18 konkurrentë të tjerë, duke e çuar në 21 numrin e banorëve.
Personazhet që janë bërë pjesë e këtij edicioni janë: Arlinda, Antoneta, Nichi, Bejta, Anjeza, Fatlum, Olechka, Vjollca, Adrian, Shqiponja, Klejda, Rron, Behare, Fuego, Sharr, Zoja, Nora, Dion, Jona, Valdet dhe Akili.
Mes konkurrentëve ka emra të njohur për publikun, përfshirë Antoneta Koçin, e cila ka qenë më parë pjesë e “Big Brother VIP Albania 2”, si dhe këngëtarët Nichi dhe Bejta.
Një tjetër personazh që tërhoqi vëmendjen gjatë hyrjes ishte Arlinda Morina, regjisorja 43-vjeçare, e cila në profilin e saj në Instagram ka bërë të ditur se është e mbijetuar nga kanceri.
Këtë sezon, drejtimi i spektaklit i është besuar Alaudin Hamitit, ndërsa në panelin e opinionistëve janë Rudina Dembacaj dhe Resul Sinani.
Me përfundimin e spektaklit të parë dhe hyrjen e të gjithë konkurrentëve të prezantuar, banorët tashmë kanë nisur bashkëjetesën brenda shtëpisë, ku gjatë javëve në vijim do të zhvillohet gara për fituesin e edicionit të pestë.
