Nga Jana Kolbe, BILD
Këtë moment, profesoresha e Universitetit Mjekësor ‘Charité’ në Berlin– Elisabeth Steinhagen-Thiessen (79 vjeçare), e kishte pritur për dekada. Më në fund ekziston një terapi për vlerën e nënvlerësuar të yndyrës në gjak, Lipoproteina(a), shkurt Lp(a). Një në pesë gjermanë mbart “gjenin e infarktit Lp(a)”. Ky gjen bën që niveli i rrezikshëm i yndyrës në gjak të jetë i lartë që nga lindja. Pasoja: një rrezik dy deri në trefish më i lartë për infarkt ose goditje në tru para moshës 50-vjeçare.
Një studim ka treguar tani se me një ilaç inovativ, këto nivele të rrezikshme mund të ulen pothuajse plotësisht përmes injeksioneve.
Pasoja të rënda: nga infarktet deri te amputimet
Profesoresha Steinhagen-Thiessen shpjegon: “Lp(a) është vëllai i vogël, por i rrezikshëm, i kolesterolit LDL”.
Problemi është se kjo vlerë nuk kontrollohet në analizat standarde. Si rezultat, shumë pak njerëz e dinë nëse e kanë të rritur. Sipas profesoreshës mungojnë njohuritë dhe ndërgjegjësimi: “Kam parë shumë familje ku gjyshi ka vdekur nga infarkti që në moshën 50-vjeçare. Megjithatë, pacientët e brezit tjetër habiten pse edhe ata vetë kanë pasur disa infarkte që në moshën 50-vjeçare”.
Kjo ndodh edhe sepse shumë mjekë nuk e kanë parasysh se kjo vlerë trashëgohet me një probabilitet prej 80 deri në 90 për qind.
Elisabeth Steinhagen-Thiessen është profesoreshë e lartë dhe drejton gjithashtu ambulancën për çrregullimet e metabolizmit të yndyrnave në Klinikën Universitare të Rostock-ut. Nga viti 2012 deri në 2020 ka qenë anëtare e Këshillit Gjerman të Etikës dhe konsiderohet ekspertja kryesore në Gjermani për Lipoproteinën(a), duke studiuar këtë temë që prej vitit 1987.
Pasojat mund të jenë fatale: disa pacientë vuajnë herët nga infarkte, goditje në tru ose çrregullime të qarkullimit të gjakut për shkak të bllokimit të enëve nga yndyrnat në gjak, gjë që shpesh çon edhe në amputim të këmbëve.
“Trajtoj pacientë të rinj që nuk mund të bëjnë më asgjë, sepse kanë kaluar tashmë ngjarje si infarkti,” thotë profesoresha.
Deri tani, në rastet më të rënda ekzistonte vetëm një mundësi trajtimi: pacientët duhej të shkonin çdo javë në klinikë për aferezë (pastrim gjaku), ku grimcat yndyrore hiqeshin nga gjaku.
Ilaçi i ri mund të frenojë prodhimin e Lp(a)
Tani ka më në fund shpresë për këta pacientë. Një studim klinik me 50 pacientë, i drejtuar nga proforesha Steinhagen-Thiessen, tregoi se një ilaç i bazuar në teknologjinë mRNA mund të ulë nivelin e Lp(a) me 80 deri në 90 për qind.
Për eksperten kjo është një arritje gjigante: “Asnjë nga këta pacientë nuk ka më nevojë për aferezë”.
Edhe studime të tjera treguan rezultate premtuese për ilaçin me bazë mRNA dhe substancën aktive Pelacarsen.
Pika kyçe është se ilaçi ndërhyn drejtpërdrejt në “udhëzimet” e trupit në mëlçi që janë përgjegjëse për prodhimin e Lp(a), duke i bllokuar ato në mënyrë të synuar. Ilaçi i sinjalizon trupit: “Ndalo! Mos përdor planin për prodhimin e Lp(a)-së së dëmshme!”
Kështu, kjo yndyrë e rrezikshme nuk formohet fare.
Prof. Steinhagen-Thiessen tha për BILD: “Kur mendoj se më në fund ekziston një terapi për pacientët e mi, mund të qaj nga gëzimi”.
Ilaçi ende nuk është miratuar në Gjermani, por ekspertja pret që ai të dalë në treg rreth vitit 2028.
Sipas saj, lajmi më i mirë është: “Edhe katër kompani të tjera farmaceutike kanë ilaçe të ngjashme me bazë mRNA në zhvillim. Besoj se brenda pesë viteve do të kemi të paktën pesë të tilla. Ky është një përparim fantastik”.
