Në vazhdën e aktiviteteve në Komunën e Gjilanit, Zëvendëskryeministrja dhe Ministrja e Drejtësisë, Donika Gërvalla, vizitoi Gjykatën Themelore në Gjilan, ku u prit nga Kryetari i Gjykatës, Venhar Salihu, Nënkryetari Rilind Sermaxhaj, Gjyqtarja Mevlide Shabani, dhe Administratori i Gjykatës, Shkëlqim Dushica.
Gjatë kësaj vizite, Ministrja Gërvalla u njoftua nga afër me punën e përditshme të Gjykatës Themelore të Gjilanit, si dhe bashkëpunimet profesionale dhe institucionale.
“Funksionimi i gjykatave është jetik për garantimin e sundimit të ligjit, ndërsa sfidat reale në menaxhimin e lëndëve dhe nevoja për forcim të mëtejmë të kapaciteteve institucionale dhe teknike mbeten të domosdoshme për rritjen e efikasitetit dhe besueshmërisë në sistemin gjyqësor”, u shpreh Ministrja.
Në kuadër të diskutimeve, Ministrja Gërvalla ritheksoi përkushtimin për të çuar përpara reformat në drejtësi, përfshirë funksionalizimin e Byrosë Shtetërore për Verifikimin dhe Konfiskimin e Pasurisë së Pajustifikueshme dhe paketën e pesë projektligjeve që janë në proces konsultimi me publikun, si hapa konkretë në rritjen e integritetit, llogaridhënies dhe funksionalitetit të sistemit në tërësi.
Në fund, Ministrja Gërvalla shprehu falenderimet e saj për Kryetarin Salihu, Nënkryetarin Sermaxhaj, Gjyqtaren Shabani dhe Administratorin Dushica, për mikpritjen, qasjen bashkëpunuese dhe angazhimin në funksion të forcimit të bashkëpunimit ndërinstitucional dhe avancimit të punës së gjykatës.
