TIRANË – Shqipëria do të vijojë të jetë nën ndikimin e masave ajrore të qëndrueshme dhe të nxehta edhe gjatë kësaj të hëne, duke sjellë mot kryesisht të kthjellët në të gjithë territorin.
Sipas parashikimit, gjatë orëve të mesditës dhe pasdites pritet shtim i vranësirave mesatare, kryesisht përgjatë zonave malore në veri dhe lindje të vendit.
Reshjet e shiut do të jenë të dobëta dhe me karakter lokal, të përqendruara në zonat malore të veriut dhe lindjes gjatë mesditës dhe pasdites, ndërsa pjesa tjetër e territorit pritet të mbetet pa reshje.
Era do të fryjë me drejtim veriperëndim-verilindje, me shpejtësi mesatare rreth 6 metra në sekondë. Në zonat detare, valëzimi parashikohet i ulët, me forcë 1 deri në 2 ballë.
Temperaturat do të mbeten të larta gjatë gjithë ditës, duke ruajtur kushtet tipike të motit të nxehtë të sezonit veror.
Java në vazhdim pritet të jetë e nxehtë, por nga e marta temperaturat parashihet të kenë rënie me 4 deri 5 gradë krahasuar me sot dhe nesër.
Të premten priten reshje lokale ndërsa në fillim të javës që vjen parashikohet rritje e re temperaturash duke iu rikthyer vlerave aktuale.
Moti në Shqipëri për 10 ditët e ardhshme
Shqipëria pritet të përjetojë ditë tipike vere me temperatura të larta dhe diell të fortë. Sipas parashikimeve, termometri do të luhatet mes 30 dhe 36 gradë Celsius në shumicën e zonave, ndërsa netët do të mbeten të ngrohta, me vlera që rrallë zbresin nën 18 gradë.
Në Tiranë, Elbasan dhe qytetet bregdetare si Vlora e Saranda, pritet vapë e fortë gjatë gjithë periudhës, duke e bërë të domosdoshme shmangien e ekspozimit në diell në orët e mesditës.
Në veri dhe juglindje, veçanërisht në zonat malore të Shkodrës dhe Korçës, mund të ketë reshje të izoluara shiu në disa ditë, por pa ndikim të madh në panoramën e përgjithshme të motit.
Ekspertët paralajmërojnë për indeks të lartë të rrezeve UV, ndaj rekomandohet përdorimi i kremit mbrojtës dhe hidratimi i vazhdueshëm. Kushtet mbeten të favorshme për pushuesit në bregdet, ku moti i kthjellët do të dominojë gjatë gjithë javës.
