Një deklaratë e Fabrizio Corona-s ka hapur një debat të madh në showbizz-in italian, pasi ai ka bërë një pretendim të fortë për Belén Rodriguez dhe Ignazio Moser, partnerin e motrës së saj, Cecilia Rodriguez.
Në episodin e fundit të “Falsissimo”, Corona pretendoi se mes Belén dhe Ignazio ka pasur marrëdhënie intime. Sipas versionit të tij, ngjarja do të kishte ndodhur gjatë periudhës së pandemisë dhe Cecilia nuk do të kishte qenë në dijeni.
Pretendimi është lidhur menjëherë me periudhën kur marrëdhënia mes dy motrave Rodriguez kishte kaluar një krizë. Megjithatë, nuk ka prova apo konfirmime të pavarura që vërtetojnë versionin e Corona-s.
Në diskutim është rikthyer edhe një deklaratë e Belén nga viti 2025. Gjatë intervistës në “Belve”, ajo kishte pranuar se në periudhën e konfliktit me Cecilia-n kishte bërë një “marrëzi”, por pa treguar se për çfarë bëhej fjalë. Pas deklaratave të Corona-s, në rrjet kanë nisur aludimet se dy episodet mund të lidhen, por vetë Belén nuk e ka bërë asnjëherë një pohim të tillë.
Përkundrazi, pas publikimit të pretendimeve, Belén ka reaguar duke i mohuar ato dhe duke lënë të kuptohet se çështja mund të ketë pasoja ligjore. “Jam e qetë. Reatet janë reate, ai vazhdon i pandalshëm”, është shprehur ajo, duke shtuar: “Të paktën të ndalonte për fëmijët e tij.”
Cecilia Rodriguez dhe Ignazio Moser nuk kanë dhënë deri tani një reagim të drejtpërdrejtë publik ndaj pretendimeve. Aktiviteti i tyre në rrjetet sociale ka vijuar normalisht, ndërsa Cecilia ka vazhduar të publikojë edhe për projektet që e lidhin profesionalisht me familjen Rodriguez, përfshirë Belén.
Në mbrojtje të Belén ka reaguar edhe gazetarja Selvaggia Lucarelli, e cila ka kritikuar mënyrën se si po ekspozohet jeta private e saj. “Të merresh me të në këtë moment është e neveritshme”, ka shkruar ajo.
Për momentin, akuza për një raport mes Belén Rodriguez dhe Ignazio Moser mbetet vetëm një pretendim i Fabrizio Corona-s, i mohuar nga Belén dhe i pakonfirmuar nga personat e tjerë të përfshirë.
