2
Ekspertët e shëndetit mendor thonë se ndarjet në marrëdhënie janë gjithmonë të vështira dhe secili person i përjeton ndryshe, me ndjenja trishtimi, zemërimi apo boshllëku.
Psikologu Grant Brenner shpjegon se gjëja më e rëndësishme pas një ndarjeje është mënyra si secili e kupton veten dhe si përpiqet të rikuperohet emocionalisht.
Sipas tij, kujdesi për veten në këtë periudhë është shumë i rëndësishëm, duke filluar nga gjumi, ushqimi dhe aktiviteti i përditshëm.
Një tjetër eksperte e marrëdhënieve, Elle Huerta, thotë se shumë njerëz pas ndarjes përpiqen të shpërqendrohen me dalje, festime apo izolim, por shpesh e përkeqësojnë gjendjen e tyre.
Ajo shpjegon se një nga gabimet më të mëdha është mënyra negative e të folurit me veten, ku personi fillon të fajësojë veten dhe humb vetëbesimin. Sipas saj, kjo e bën më të vështirë procesin e shërimit.
Ekspertët këshillojnë që në këtë periudhë të mos izolohesh, por të ruash kontakt me njerëz që japin mbështetje dhe të mos neglizhosh nevojat bazë të trupit dhe mendjes.
Sipas tyre, shërimi pas një ndarjeje kërkon kohë, por mënyra si flasim me veten luan një rol të madh në sa shpejt dhe sa lehtë kalon kjo periudhë.
ks
