Ministri i Mbrojtjes, Ejup Maqedonci, në emisionin “Info Nata” në Tëvë1 ka folur lidhur me aktgjykimin dënues të shpallur më 16 shtator për ish-krerët e UÇK-së, Hashim Thaçi, Kadri Veseli, Rexhep Selimi dhe Jakup Krasniqi.
Ai tha se, përderisa nuk është larguar pjesa “Ndërmarrje e Përbashkët Kriminale”, atëherë është vënë në pikëpyetje i gjithë organizimi, duke vënë në pikëpyetje edhe luftën e UÇK-së.
“Unë vlerësoj se, përderisa mbetet ajo pjesa që është bërë me qëllim të përbashkët kriminal dhe ndërmarrje të përbashkët kriminale, synimi nuk është individual, është synim i dënimit të një qëllimi, sepse qëllimi është ideja, qëllimi është organizimi. Dhe në qoftë se vë në pikëpyetje gjithë organizimin dhe gjithë qëllimin e Ushtrisë Çlirimtare të Kosovës, atëherë e ke vënë në pikëpyetje edhe luftën e Ushtrisë Çlirimtare të Kosovës.”,tha Maqedonci.
Ai tutje tha se është tentuar vazhdimisht që gjykata të paraqitet si një gjykatë që dënon vetëm krimet individuale, gjë që, sipas tij, në fund nuk ndodhi ashtu.
“Vlerësoj se është tentuar në vazhdimësi që kjo gjykatë të paraqitet si një gjykatë që dënon krime individuale, mirëpo në fund u pa që, përveç asaj pjese të krimeve monstruoze të trafikimit të organeve, që është hequr nga aktakuza, pjesa tjetër ka mbetur ashtu siç është tentuar të mbetet. Dhe unë e them me përgjegjësi të plotë, edhe si ish-pjesëtar i Ushtrisë Çlirimtare të Kosovës, se, në qoftë se krahasojmë të gjitha luftërat çlirimtare, vlerësoj se lufta e Ushtrisë Çlirimtare të Kosovës ka qenë njëra ndër luftërat më të pastra në historinë e njerëzimit të një populli për liri”, tha tutje Maqedonci.
Ndër të tjera, Maqedonci u pyet edhe për momentin kur dëgjoi shpalljen e aktgjykimit dënues për ish-krerët e UÇK-së.
Ai tha se në ato momente, gjëja e parë që i vjen në mendje janë vuajtjet e popullit tonë dhe se UÇK-ja erdhi si rezultat i një represioni dhe gjenocidi.
“Normalisht që gjëja e parë dhe elementet e para të asaj lufte që të kthehen në kujtesë janë vuajtjet e popullit tonë. Ne nuk do të harrojmë kurrë që kjo ushtri erdhi si rezultat i një represioni të vazhdueshëm, i një gjenocidi të paparë, dhe që nuk kishte filluar vetëm në vitet e ’90-ta, por që kishte filluar që në vitin 1912 dhe nuk përfundoi deri në përfundimin e luftës së Kosovës”, tha Maqedonci.
Më tej, ai tha se UÇK-ja nuk është e ndarë nga populli, por buron nga populli i Kosovës.
“Pra, kemi të bëjmë me një dhunë të paparë, e cila nxori në pah rezistencën e popullit tonë, pra shpirtin luftarak të popullit tonë gjatë të gjitha fazave, sepse, fundja, Ushtria Çlirimtare e Kosovës është një produkt i sjellë nga lëvizjet dhe shumë organizime që janë bërë që nga viti 1912. Lidhet me vetë Komitetin Kombëtar për Çlirimin e Kosovës dhe idenë për çlirimin e Kosovës në atë periudhë, e deri te lëvizjet ilegale, lëvizjet e tjera për liri dhe pavarësi. Pra, Ushtria Çlirimtare e Kosovës nuk është e ndarë nga populli; është pjesë dhe buron nga populli i Kosovës, nga vullneti, dëshira dhe ideja e popullit të Kosovës për liri dhe pavarësi”, deklaroi Maqedonci, teksa fliste për vendimin e 16 shtatorit.
