Deputeti i Lëvizjes Vetëvendosje (LVV), Ilir Kërçeli, ka deklaruar se partia e tij nuk do të bëjë koalicion me Listën Serbe në asnjë rrethanë.
Në një postim publik, Kërçeli tha se LVV po vendos një “standard të ri” në politikën e Kosovës, duke përjashtuar çdo bashkëpunim me këtë subjekt politik.
Ai gjithashtu theksoi se ruajtja e raporteve me Shtetet e Bashkuara të Amerikës nuk mund të bëhet përmes bashkëpunimit me një parti, disa prej drejtuesve të së cilës, sipas tij, ndodhen në listën e zezë të SHBA-së.
Postimi i plotë:
Tani, ndërsa po numërohen votat e fundit për përcaktimin e rezultatit përfundimtar, Lëvizja Vetëvendosje! tashmë ka vendosur një standard të ri në politikën e Kosovës: nuk ka dhe nuk do të ketë koalicion me Listën Serbe, në asnjë rrethanë.
Kushdo që mendon se miqësia me Shtetet e Bashkuara të Amerikës mund të ruhet përmes bashkëpunimit me një subjekt politik, gjysma e drejtuesve të të cilit gjenden në listën e zezë të SHBA-së, bën një gabim të madh në vlerësim.
