Rumer Willis, vajza e aktorit Bruce Willis, ka vendosur të bëjë teste gjenetike pasi babai i saj u diagnostikua me demencë. Aktorja 38-vjeçare thotë se është e rëndësishme për të që të ketë sa më shumë informacion rreth shëndetit të saj, sepse, siç thotë ajo, “informacioni është fuqi”.
Vajza më e madhe e një ylli të Hollivudit donte të kontrollonte nëse ishte në rrezik të shtuar për të zhvilluar probleme të ngjashme shëndetësore, duke pasur parasysh historinë e saj familjare të sëmundjes, transmeton Indeksonline.
Bruce Willis ka pesë vajza. Ai ka Rumer, Scout (35) dhe Tallulah (32) me ish-gruan Demi Moore, dhe Mabel (14) dhe Evelyn (12) me gruan aktuale Emma Heming Willis. Familja e aktorit njoftoi në vitin 2023 se ai vuante nga demenca frontotemporale (FTD), një vit pasi ai u tërhoq nga aktrimi për shkak të një diagnoze të afazisë.
“Ndonjëherë është e frikshme të marrësh përgjigje”
Rumer shpjegoi se vendosi të testohej sepse donte të kuptonte më mirë rreziqet e mundshme që rrjedhin nga gjenetika e saj.
“Ndonjëherë është e frikshme të marrësh përgjigje. Është e qartë se ka disa predispozita gjenetike në familjen time. Jo vetëm demencë, por edhe anëtarë të familjes që kanë pasur kancer të gjirit dhe probleme të tjera shëndetësore”, tha ajo për People.
Rumer ndau rezultatet e saj edhe në Instagram, duke folur konkretisht për rrezikun e saj për zhvillimin e sëmundjes së Alzheimerit. “Rezultati im është tre ose katër, që është mjaft mesatar. Do të thotë se ka njëfarë rreziku, por nuk është asgjë alarmante”, shpjegoi ajo.
