Ndërsa vendi po i afrohet ditës së zgjedhjeve parlamentare, debati politik është intensifikuar dhe interesimi i qytetarëve për rezultatin përfundimtar është më i madh se kurrë.
Fushata zgjedhore ka sjellë premtime, përballje politike dhe strategji të ndryshme për të fituar besimin e elektoratit. Në këtë fazë vendimtare, vëmendja është përqendruar te pritshmëritë për rezultatin e zgjedhjeve dhe mundësitë për formimin e qeverisë së ardhshme.
Gjatë javëve të fundit, partitë politike kanë shtuar aktivitetet e tyre në terren, duke organizuar takime me qytetarë, tubime elektorale dhe debate publike për të prezantuar programet dhe prioritetet e tyre.
Çështje si ekonomia, punësimi, arsimi, shëndetësia dhe integrimet evropiane kanë dominuar diskutimet politike, ndërsa qytetarët po analizojnë me kujdes alternativat që u ofrohen.
Me zgjedhjet që po afrohen dhe me një garë që pritet të jetë mjaft dinamike, mbetet të shihet nëse rezultati do të sjellë një shumicë të qartë qeverisëse apo nëse vendi do të përballet me nevojën për koalicione dhe negociata politike për formimin e institucioneve të reja.
E në lidhje me këtë temë në një prononcim për “Bota sot”, ka folur profesori Nijazi Halili.
Ai tha se Lëvizja Vetëvendosje pritet të mbetet forca e parë politike në vend, ndërsa PDK dhe LDK pritet të renditen si forcat kryesore opozitare.
Nijazi Halili
Gjithashtu thekson se, pavarësisht rezultatit zgjedhor, sfida më e madhe do të jetë krijimi i një shumice funksionale dhe sigurimi i stabilitetit institucional për qeverisjen e ardhshme.
“Vetëm pak ditë para zgjedhjeve parlamentare, vërehet një mobilizim i shtuar i partive politike dhe një interesim më i madh i qytetarëve për procesin zgjedhor. Bazuar në trendet elektorale të viteve të fundit, fuqinë organizative të partive në terren dhe zhvillimet politike që kanë paraprirë këto zgjedhje, vlerësoj se gara mbetet e dominuar nga subjektet kryesore politike, me Lëvizjen Vetëvendosje që vazhdon të ruajë pozitën e forcës së parë në vend.
Sipas vlerësimit tim, LVV mund të lëvizë në intervalin 48–53 për qind të votave, duke mbetur dukshëm përpara konkurrentëve të saj. PDK pritet të konfirmohet si forca e dytë politike me rreth 20–24 për qind, ndërsa LDK mund të arrijë ndërmjet 12–17 për qind. AAK-Nisma pritet të ruajë mbështetjen tradicionale në nivelin 5–8 për qind.
Megjithatë, përtej rezultatit elektoral, sfida kryesore mbetet formimi i institucioneve të qëndrueshme. Në demokracitë parlamentare, fitimi i zgjedhjeve është vetëm hapi i parë, ndërsa aftësia për të ndërtuar shumicë funksionale dhe për të garantuar stabilitet institucional është ajo që përcakton suksesin e qeverisjes”, u shpreh ai.
Duke vazhduar bisedën Halili shpjegon seqytetarët presin rezultate konkrete dhe se vota e tyre do të jetë mesazh për drejtimin e vendit.
Ai vlerëson se nuk pritet ndryshim i madh në renditjen e partive, por sfida kryesore mbetet krijimi i një qeverisjeje të qëndrueshme dhe efektive.
“Këto zgjedhje po zhvillohen në një kohë kur qytetarët presin më shumë rezultate konkrete në ekonomi, mirëqenie sociale, sundim të ligjit dhe integrim ndërkombëtar. Prandaj, vota e qytetarëve nuk do të jetë vetëm një përcaktim partiak, por edhe një mesazh për drejtimin që duhet të marrë Kosova në vitet e ardhshme.
Në vlerësimin tim, nuk pritet ndonjë ndryshim i madh në renditjen e partive politike, por mbetet për t’u parë nëse rezultati do të prodhojë stabilitet afatgjatë institucional. Përfundimisht, fituesi i vërtetë i këtyre zgjedhjeve do të jetë ai subjekt ose koalicion që do të arrijë të shndërrojë mbështetjen elektorale në qeverisje efektive dhe në institucione funksionale për qytetarët e Kosovës”, përfundoi profesori Halili për “Bota sot”.
