Policia e Kosovës ka arrestuar një person në Ferizaj, nën dyshimin për veprën penale “Mbajtja në pronësi, kontroll ose posedim të paautorizuar të armëve”.
Sipas njoftimit të Policisë, Njësiti i Hetimeve i Stacionit Policor në Ferizaj, gjatë hetimit të një rasti të iniciuar ditë më parë, ka siguruar informacione se një person dyshohej se posedonte në mënyrë të kundërligjshme një armë zjarri.
Më 2 shtator 2026, zyrtarët policorë kanë kontaktuar të dyshuarin M.M., 42-vjeçar, i cili ka pranuar se në shtëpinë e tij, në fshatin Talinovc i Jerlive, posedonte një armë zjarri.
“Njësiti i Hetimeve i Stacionit Policor në Ferizaj, gjatë hetimit të një rasti të iniciuar ditë më parë, ka siguruar informacione se një person i dyshuar po posedonte në mënyrë të kundërligjshme një armë zjarri. Lidhur me këtë, zyrtarët policorë kanë kontaktuar personin e dyshuar M.M. (42 vjeç), i cili ka pranuar se në shtëpinë e tij në fshatin Talinovc i Jerlive posedonte një armë zjarri”, thuhet në njoftimin e Policisë.
Pas kësaj, Njësiti i Hetimeve, në bashkëpunim me Njësitin e Forenzikës, ka realizuar kontroll në shtëpinë e të dyshuarit.
Gjatë kontrollit janë gjetur dhe sekuestruar:
Një armë me gaz;
13 fishekë të armës me gaz;
Dy fishekë të armës së shkurtër;
Një fishek i armës së gjatë.
“Me këtë rast, Njësiti i Hetimeve, në bashkëpunim me Njësitin e Forenzikës, ka realizuar kontroll në shtëpinë e të dyshuarit, ku janë gjetur dhe sekuestruar: një armë me gaz, 13 fishekë të armës me gaz, dy fishekë të armës së shkurtër dhe një fishek i armës së gjatë”, thuhet më tej në njoftim.
Për rastin është njoftuar Prokurori i Shtetit, i cili ka autorizuar inicimin e rastit penal për veprën “Mbajtja në pronësi, kontroll ose posedim të paautorizuar të armëve”.
I dyshuari është liruar në procedurë të rregullt hetimore.
