Ministri i Punëve të Jashtme i Zvicrës dhe kryesues i radhës i OSBE-së, Ignazio Cassis, po zhvillon sot një vizitë zyrtare në Kosovë. Ai është takuar me presidenten Justina Shiroka Pula dhe me zëvendëskryeministrin e parë e ministrin e Punëve të Jashtme dhe Diasporës, Glauk Konjufca. Në takimin me presidenten, Cassis rikonfirmoi se Zvicra do të vazhdojë të qëndrojë përkrah Kosovës edhe në të ardhmen.
Ndalesa në Prishtinë është pjesë e një turneu rajonal. Cassis e nisi atë më 4 nëntor në Serbi dhe e përmbyll nesër, më 6 nëntor, në Maqedoninë e Veriut.
Shiroka Pula: Mërgata, urë lidhëse mes dy shteteve
Takimi me presidenten u mbajt paradite në Kabinetin e Presidentes, me dyer të mbyllura. Mediat u lejuan vetëm të xhironin pamje. Sipas njoftimit të Presidencës, Shiroka Pula i vlerësoi marrëdhëniet mes Kosovës dhe Zvicrës si të shkëlqyera dhe e falënderoi Bernën për mbështetjen e vazhdueshme.
Presidentja kërkoi thellimin e lidhjeve ekonomike, më shumë shkëmbime tregtare dhe më shumë investime zvicerane në Kosovë. Ajo e cilësoi të mirë bilancin tregtar mes dy vendeve. Sipas saj, ai mund të rritet edhe më shumë me mundësitë që hap marrëveshja me EFTA-n.
Shiroka Pula i kërkoi Zvicrës të vazhdojë ta mbështesë Kosovën në forcimin e pozitës ndërkombëtare dhe në procesin e anëtarësimit në organizata ndërkombëtare. Ajo veçoi edhe rolin e mërgatës shqiptare në Zvicër. Sipas saj, mërgata kontribuon aktivisht në vendin ku jeton dhe shërben si urë lidhëse mes dy shteteve. Presidentja shprehu mirënjohje edhe për kontingjentin zviceran të KFOR-it, SWISSCOY, që shërben në Kosovë që nga viti 1999.
Nga ana e tij, Cassis tha se Zvicra do të vazhdojë ta mbështesë Kosovën. Ai shprehu përkrahje edhe për presidenten e re të vendit.
Takim me Konjufcën në MPJD
Pas Presidencës, kryediplomati zviceran u prit nga ministri Konjufca në objektin e Ministrisë së Punëve të Jashtme dhe Diasporës në Prishtinë. Pas takimit ishte paralajmëruar një konferencë e përbashkët për media.
Tregtia e lirë, KFOR-i dhe ambasada e re
Sipas programit të Departamentit Federal të Punëve të Jashtme në Bernë, Cassis në Kosovë takon edhe kryeministrin Albin Kurti. Ai viziton gjithashtu misionin paqeruajtës të NATO-s, KFOR, dhe misionin e OSBE-së në Prishtinë. Në program është edhe përurimi i ambienteve të reja të Ambasadës së Zvicrës në Prishtinë.
Në qendër të bisedimeve janë dy çështje. E para është marrëveshja e tregtisë së lirë mes Kosovës dhe shteteve të EFTA-s, përfshirë Zvicrën, e cila ka hyrë së fundmi në fuqi. E dyta është mbështetja zvicerane për dialogun mes Prishtinës dhe Beogradit. Berna ka bërë të ditur se Cassis gjatë turneut do të theksojë rëndësinë e dialogut, të përballjes me të kaluarën dhe të mbrojtjes së të gjitha komuniteteve.
Në Beograd, si kryesues i OSBE-së, Cassis kishte paraparë bisedime me presidenten e përkohshme të Serbisë, Ana Brnabiq, dhe me përfaqësues të zgjedhur të Listës Studentore, pak ditë pas zgjedhjeve të parakohshme parlamentare atje. Në Shkup ai takohet me ministrin e Jashtëm, Timço Mucunski.
Departamenti zviceran i Jashtëm thekson se lidhjet e ngushta të Zvicrës me vendet e Ballkanit Perëndimor janë forcuar edhe përmes diasporës së madhe që jeton dhe punon në Zvicër.
