Dua Lipa dhe bashkëshorti i saj, Callum Turner, kanë nisur festimet për ceremoninë e tyre të dytë martesore në Itali.
Këngëtarja e hitit “Houdini” dhe aktori britanik u panë të premten në Palermo, ku organizuan një festë paraprake para dasmës, në praninë e familjarëve, miqve dhe disa emrave të njohur të industrisë së muzikës dhe kinemasë.
Për këtë mbrëmje speciale, Dua Lipa tërhoqi vëmendjen me një fustan elegant ngjyrë fildishi, pa shpinë, të kombinuar me aksesorë luksozë dhe bizhuteri të shkëlqyera. Çifti u fotografua duke përshëndetur të ftuarit, mes të cilëve ishin edhe Charli XCX, Joe Alwyn, George Daniel dhe Grace Gummer.
Festimet vijnë vetëm pak ditë pasi çifti kurorëzoi dashurinë në një ceremoni intime të zhvilluar më 31 maj në Londër. Për ditën e madhe, Dua kishte zgjedhur një krijim të veçantë couture, të kombinuar me doreza elegante dhe një kapelë të bardhë, ndërsa Turner u shfaq me një kostum klasik në ngjyrë blu të errët.
Para festës në Itali, dyshja u fotografua duke shijuar momente të qeta së bashku në Palermo, ku po përgatiten për një seri festimesh që pritet të zgjasin disa ditë.
Dua Lipa dhe Callum Turner nisën të përfliteshin si çift në janar të vitit 2024, ndërsa pak muaj më vonë e konfirmuan publikisht romancën e tyre. Në qershor të vitit 2025, këngëtarja zbuloi se ishte fejuar me aktorin britanik, duke shprehur dëshirën që martesa të zhvillohej pas përfundimit të turneut të saj botëror.
Pas ceremonisë civile në Londër, Dua ndau me ndjekësit disa fotografi nga dita e veçantë, duke i shoqëruar me mbishkrimin “31.05.2026 🤍”.
