Imazhi ikonë i Princeshës Diana me të ashtuquajturin “fustani i hakmarrjes” vijon të mbetet një nga momentet më të famshme të historisë moderne të familjes mbretërore britanike dhe të modës botërore. Por së fundmi, vëmendja e koleksionistëve është zhvendosur edhe te një tjetër detaj i asaj nate historike: automjeti që e shoqëroi atë drejt ngjarjes.
Bëhet fjalë për një Jaguar XJ40 Sovereign, i cili transportoi Princeshën Diana në qershor të vitit 1994 drejt Galerisë Serpentine në Londër, ku ajo u shfaq me fustanin e famshëm prej kadifeje të stilistes Christina Stambolian.
Makina luksoze, me ngjyrë jeshile të errët, pritet të dalë së shpejti në ankand, duke ngjallur interes të madh mes koleksionistëve të objekteve me lidhje mbretërore.
Sipas të dhënave, automjeti iu dorëzua Pallatit Kensington në vitin 1994 dhe u përdor ekskluzivisht për transportin e Princeshës Diana deri në vitin 1997, përpara se të kalonte në pronësi private pak muaj para vdekjes së saj tragjike.
Jaguar-i ruan ende disa elementë origjinalë të përdorimit mbretëror, përfshirë hapjet për vendosjen e flamurit dhe një telefon të integruar Motorola me buton emergjence sigurie, tipik për teknologjinë e asaj kohe.
Sipas raportimeve të mediave ndërkombëtare, makina pritet të dalë në ankand më 1 qershor, me një vlerësim fillestar që varion nga 50,000 deri në 150,000 paund.
Ngjarja e 1994-ës, kur Diana u shfaq në publik pas transmetimit të intervistës së Princit Charles ku ai pranoi tradhtinë martesore, u interpretua gjerësisht si një moment simbolik force dhe pavarësie. Pamja e saj atë natë, me “fustanin e hakmarrjes”, u shndërrua në një nga imazhet më të fotografuara dhe më ikonike të viteve ’90.
