1
Me rritjen e temperaturave, shumë persona përballen me djersitje të shtuar të këmbëve dhe me erë të pakëndshme. Përveç kësaj, gjatë verës rritet edhe rreziku për infeksione mykotike, sidomos në zonën mes gishtërinjve.
Disa mënyra të thjeshta në kushte shtëpie mund të ndihmojnë për të mbajtur këmbët të pastra dhe pa erë. Një prej tyre është përdorimi i talkut, i cili mund të hidhet në këmbë dhe brenda këpucëve për të thithur lagështinë. Mund të shtohet edhe sherebelë e thatë për aromë më të freskët.
Një tjetër zgjidhje është masazhi i këmbëve me vaj, limon ose sherebelë, që ndihmon në uljen e djersitjes. Po ashtu, banjat e këmbëve me çaj sherebele janë një mënyrë e lehtë për t’i mbajtur ato të pastra dhe të freskëta.
Për kujdesin e përditshëm këshillohet të shmangen çorapet sintetike dhe këpucët që nuk lejojnë ajrosjen, ndërsa higjiena duhet të jetë e rregullt. Ecja zbathur kur është e mundur ndihmon gjithashtu në uljen e lagështisë.
Në rastet kur shfaqen infeksione mykotike, disa metoda natyrale mund të japin rezultat. Kosi është një prej tyre, pasi përmban baktere të dobishme që ndihmojnë në luftimin e kërpudhave. Mund të përdoret duke i zhytur këmbët ose duke e aplikuar direkt mbi lëkurë.
Edhe përzierjet me ujë dhe sodë buke, apo përdorimi i peroksidit të hidrogjenit të holluar në ujë, ndihmojnë në pastrimin dhe dezinfektimin e këmbëve.
Këto mënyra të thjeshta mund të ndihmojnë për të shmangur problemet më të zakonshme të këmbëve gjatë sezonit të verës dhe për t’i mbajtur ato të shëndetshme.
ks
