Pas gati një shekulli pa të dhëna të besueshme shkencore është konfirmuar se një primat i vogël me sy të mëdhenj kishte mbijetuar gjatë gjithë kohës i fshehur nga komuniteti shkencor në ishullin indonezian Bangka.
Bëhet fjalë për lorisin e ngadaltë të Bangkas”, i njohur shkencërisht si Nycticebus bancanus. Duke ngjarë me një lodër prej pelushi, me sytë e tij gjigantë dhe trupin e imët, kjo kafshë zotëron veçori që e bëjnë atë një nga llojet më të jashtëzakonshme të primatëve.
Ajo që është edhe më e habitshme, është se ky është i vetmi primat helmues i njohur në botë, raporton KosovaPress.
Një nga karakteristikat më të pazakonta të loriseve të ngadalta është aftësia e tyre për të prodhuar helm, gjë që i dallon ato nga primatët. Kur ndihen të kërcënuara, ato lëpijnë sekretimin nga këto gjëndra dhe e përziejnë atë me pështymën. Kjo krijon një përzierje helmuese që mund të transmetohet përmes një kafshimi.
Një kafshim mund të shkaktojë dhimbje të forta, ënjtje dhe reaksione serioze alergjike, të cilat në disa raste mund të jenë kërcënuese për jetën.
Sytë e tyre të mëdhenj janë përshtatur me një stil jetese nate. Ato lëvizin ngadalë dhe në heshtje nëpër majat e pemëve, duke u ushqyer me insekte, eksudate bimësh dhe pjesë të tjera të bimëve.
Të dhënat e fundit historike shkencore për këtë lloj datojnë që nga gjysma e parë e shekullit të 20-të. Edhe pse banorët vendas dhe ekipet e shpëtimit kishin hasur këta primatë për vite me radhë, vëzhgimet e tyre nuk ishin përmbledhur në një studim që mund të konfirmonte përfundimisht ekzistencën e vazhdueshme të specieve.
Lorisi i ngadaltë i Bangka u përshkrua shkencërisht në vitin 1906, por nuk u njoh si një specie e veçantë deri në vitin 2013. Në vitin 2020, Bashkimi Ndërkombëtar për Ruajtjen e Natyrës (IUCN) e klasifikoi atë si të rrezikuar në mënyrë kritike, duke vënë në dukje mundësinë që ai mund të jetë zhdukur tashmë.
