Rregullat e vendosura pas Brexit-it që kanë ndikuar në eksportet e ushqimeve të Mbretërisë së Bashkuar drejt Bashkimit Europian pritet të hiqen nga mesi i vitit 2027, si pjesë e marrëveshjes së re të negociuar mes Londrës dhe Brukselit.
Këto ndryshime përfshijnë lehtësimin e eksportit të produkteve si mish i freskët, i ngrirë dhe i përpunuar (përfshirë salçiçet dhe hamburgerët), të cilat aktualisht kërkojnë certifikata veterinare dhe dokumentacion të kushtueshëm për të vërtetuar përputhshmërinë me standardet e BE-së.
Sipas marrëveshjes së re, këto certifikata dhe një pjesë e dokumentacionit fitosanitar për bimët dhe materialet e paketimit prej druri mund të hiqen, duke ulur ndjeshëm burokracinë për eksportuesit britanikë. Edhe bizneset që tregtojnë në Irlandën e Veriut pritet të përfitojnë nga lehtësimi i etiketimit shëndetësor.
Edhe pse detajet përfundimtare të marrëveshjes sanitare dhe fitosanitare (SPS) ende nuk janë finalizuar, autoritetet britanike kanë publikuar udhëzime paraprake për bizneset që të përgatiten për ndryshimet.
Qeveria britanike e ka cilësuar këtë marrëveshje si një hap të rëndësishëm për rritjen e eksportit, mbështetjen e vendeve të punës dhe uljen e kostove për bizneset, me një ndikim të pritshëm deri në 5.1 miliardë paund në ekonomi çdo vit.
Negociatat mes palëve kanë nisur vitin e kaluar dhe pritet të finalizohen në kuadër të samitit të ardhshëm BE-MB në korrik.
/tiranapost
