Ngrohja e detit dhe tërheqja e akullit detar po sjellin ndryshime të mëdha në ekosistemin e Groenlandës Lindore. Një studim ka dokumentuar praninë e qindra balenave gjigante në zona ku këto kafshë historikisht nuk ishin të pranishme gjatë muajve të verës.
Studiuesit kanë vëzhguar balena me kurriz të gungëzuar, balena me pendë dhe balena minke, të cilat tashmë po shfrytëzojnë ujërat e hapura përgjatë bregdetit lindor të Grenlandës për t’u ushqyer.
Shkencëtarët e përshkruajnë këtë zhvillim si një “ndryshim të madh të regjimit ekologjik”, pasi zhdukja e akullit detar po hap zona të reja ushqimi për disa prej gjitarëve më të mëdhenj të planetit.
Ndryshimi është veçanërisht i dukshëm te balenat me kurriz të gungëzuar. Sipas vlerësimeve të studimit, gjatë verës së vitit 2024 në Detin e Grenlandës mund të kenë qenë rreth 4,000 balena gunga, 6,000 balena me pendë dhe 6,000 balena minke.
Sipas studiuesve, një nga faktorët kryesorë është rritja e temperaturës së ujit. Me tërheqjen e akullit detar, ujërat bregdetare që dikur ishin të bllokuara për shumë prej këtyre specieve janë bërë më të aksesueshme. Në të njëjtën kohë, peshq dhe organizma të tjerë detarë janë zhvendosur drejt këtyre ujërave më të ngrohta, duke krijuar një burim të rëndësishëm ushqimi.
Studiuesit vlerësojnë se vetëm këto tri lloje balenash mund të konsumojnë të paktën 800 mijë tonë peshq dhe krill gjatë sezonit veror të ushqyerjes.
Megjithëse disa balena duket se po përfitojnë nga ngrohja e ujërave, ndryshimi nuk është pozitiv për të gjitha kafshët e Arktikut.
Specie të përshtatura me kushtet e ftohta, përfshirë narvalët dhe belugat, po përballen me humbjen e habitatit të tyre tradicional. Hapja e ujërave ndaj specieve të reja mund të sjellë gjithashtu konkurrencë të shtuar për ushqim dhe ndryshime në marrëdhëniet ekologjike.
