Zyra për Mbrojtje dhe Ndihmë të Viktimave (ZMNV) ka njoftuar se gjatë periudhës 25 shtator – 2 tetor 2026, Mbrojtësit e Viktimave në nivel të Republikës së Kosovës kanë trajtuar gjithsej 57 raste të reja.
Prej tyre, 48 raste kanë të bëjnë me dhunë në familje, ndërsa rastet e tjera përfshijnë trafikim, dhunë seksuale, ngacmim, vrasje në tentativë, bashkëjetesë nën moshën 16-vjeçare, krime lufte dhe raste të tjera.
Gjatë kësaj periudhe janë parashtruar edhe 6 kërkesa për urdhërmbrojtje dhe 12 kërkesa për urdhërmbrojtje emergjente në gjykata.
Sipas të dhënave të ZMNV-së, Mbrojtësit e Viktimave kanë marrë pjesë në 104 seanca gjyqësore dhe 19 seanca në Prokurori, ndërsa kanë dhënë 63 këshilla juridike.
Po ashtu, janë evidentuar 19 aktgjykime dënuese, 3 aktgjykime refuzuese dhe 3 ankesa në shkallë të dytë.
ZMNV ka bërë me dije se gjatë kësaj periudhe janë trajtuar edhe raste që lidhen me kompensimin e viktimave, referime në Qendrat për Punë Sociale dhe Agjencinë për Ndihmë Juridike Falas, si dhe përfaqësime të rasteve në Polici dhe në strehimore.
