Nënë e bir, Sadete dhe Gazmir Fiku, janë paraqitur përpara togave të zeza për t’u njohur me masën e sigurisë, pasi akuzohen për vrasjen e kryefamiljarit Urim Fiku, 61 vjeç, përkatësisht bashkëshortit dhe babait, ngjarje e rëndë kjo e ndodhur në fshatin Godvi të Bulqizës.
Në përfundim të seancës gjyqësore, pasi dëgjoi pretendimet e palëve, gjykata vendosi masën e sigurisë “Arrest në burg” për të dy të akuzuarit.
Gjatë seancës, të dy të dyshuarit kanë mohuar përfshirjen në vrasje, duke i qëndruar versionit të dhënë që në deklarimet e tyre fillestare.
Sipas pretendimeve të tyre, 61-vjeçari është sulmuar nga një ari në pyll dhe është kthyer në banesë me dëmtime të rënda fizike dhe i gjakosur.
Nënë e bir deklaruan se pas sulmit nga kafsha e egër, viktima ka hyrë në shtëpi, ka marrë pistoletën dhe ka qëlluar veten në gjoks, moment në të cilin bashkëshortja ka njoftuar menjëherë shërbimin e urgjencës.
Nga ana e tij, i biri, Gazmir Fiku, ka pretenduar alibi për kohën e ngjarjes, duke deklaruar se nuk ndodhej në banesë pasi ishte në detyrë pranë zyrave të OSHEE-së në Bulqizë.
Gjatë dëshmisë, ata kanë shtuar gjithashtu se viktima vendoste shpesh leqe në pyll për kapjen e kafshëve të egra, kryesisht derrave të egër, çka sipas tyre mund të ketë nxitur edhe sulmin e ariut.
Me gjithë pretendimet e familjarëve, grupi hetimor pret rezultatet e ekspertimeve të mjekësisë ligjore dhe akt-ekspertimet e Policisë Shkencore, të cilat konsiderohen vendimtare për të përcaktuar dinamikën e ngjarjes.
/rtsh.al/
