Aktorja amerikane Selma Blair është thirrur për t’u paraqitur para drejtësisë, nën akuzën e sulmit, pasi dyshohet se ka goditur pjesëtarë të ekuipazhit në një avion, bëjnë të ditur autoritetet.
Ylli i filmit Legally Blonde u hetua nga FBI-ja pas një konflikti të dyshuar gjatë një fluturimi të kompanisë Delta Air Lines nga Los Angeles drejt New York-ut.
Autoritetet e aeroportit thanë se të dielën kishin marrë një njoftim për një “pasagjere fizikisht agresive” në bordin e avionit. Sipas Autoritetit Portual të New York-ut, dy stjuardesa u lënduan dhe njëra prej tyre u dërgua në spital.
Blair, 54 vjeçe, e njohur gjithashtu për rolet në filmat Hellboy dhe Cruel Intentions, u arrestua dhe u dërgua në spital. Përfaqësuesi i saj për shtyp i tha BBC-së se aktorja kishte “pësuar një urgjencë mjekësore që çoi në sjelljen e pretenduar”.
“Pas uljes së avionit, ajo mori menjëherë ndihmën e nevojshme mjekësore dhe aktualisht ndodhet në gjendje të qëndrueshme”, deklaroi përfaqësuesi i saj.
Sipas CBS News, partnerit mediatik amerikan të BBC-së, Blair u transportua me ambulancë drejt spitalit, ku dyshohet se goditi me shkelm një punonjës policie. Prokurorët kanë pretenduar se, pasi mbërriti në spital, ajo sulmoi edhe një infermiere.
Aktorja u largua nga spitali dhe u dërgua në qendrën e paraburgimit në Queens, ku u deklarua e pafajshme për dy akuza për sulm të shkallës së dytë, lidhur me incidentet e pretenduara në ambulancë dhe në spital.
CBS raportoi se një gjykatës e caktoi garancinë pasurore në 20 mijë dollarë para në dorë ose 60 mijë dollarë garanci me kusht. Seanca e radhës është caktuar për më 19 janar, shkruan BBC.
