Në një kohë kur protestat në Tiranë vijojnë prej gjashtë ditësh, Kryepiskopi i Tiranës, Durrësit dhe i Gjithë Shqipërisë, Joan, bëri thirrje për urtësi, pjekuri dhe përgjegjësi në marrjen e vendimeve në shërbim të vendit.
Në përfundim të Liturgjisë Hyjnore të ditës së sotme, Kryepiskopi Joan u lut që Perëndia të ndriçojë të gjithë ata që kanë përgjegjësinë e marrjes së vendimeve, në mënyrë që ato të jenë të drejta dhe në shërbim të të gjithë qytetarëve.
“Lutemi që Perëndia t’i ndriçojë të gjithë ata që kanë përgjegjësinë e vendimeve, të marrin vendime të urta dhe të pjekura në shërbim të të gjithë vendit. Sepse Shqipëria është e të gjithëve. Të gjithë ata që banojnë këtu, janë pjesë e saj dhe të gjithë kanë të drejtën për të marrë pjesë në ndërtimin e saj. Prandaj, i lutemi Zotit që të ndriçojë mendjet për të marrë vendimet e duhura dhe shpresojmë që lutjet e të drejtëve Perëndia do t’i dëgjojë. Shqipëria është e të gjithëve”, u shpreh, Kryepiskopi Joan.
