“Njeri” është shpallur Fjala e Vitit për vitin 2026 nga Fjalori i Kembrixhit, ndërsa inteligjenca artificiale po ndryshon mënyrën se si e shohim veten.
Fjala përkufizohet në fjalor si të kesh cilësitë, të metat dhe ndjenjat që kanë njerëzit, në dallim nga perënditë, kafshët apo makinat.
Colin McIntosh, nga Fjalori i Kembrixhit, tha: “Inteligjenca artificiale po ndryshon mënyrën se si flasim për të qenët njeri.
“Frika se çfarë mund të humbasin njerëzit kur ia delegojmë të menduarit tonë inteligjencës artificiale na ka bërë të rishqyrtojmë shkallën në të cilën mbështetemi tek ajo.”
Ai tha se përdorimi në rritje i termave si “i krijuar nga njeriu” tregonte se njerëzit po e dallonin gjithnjë e më shumë punën e kryer nga njeriu nga ajo e realizuar nga inteligjenca artificiale.
Duke komentuar zgjedhjen e fjalorit, manjati i Microsoft-it, Bill Gates, tha: “Inteligjenca artificiale po na bën të mendojmë më thellë se çfarë do të thotë të jesh njeri.
“Ajo mund të na ndihmojë të kurojmë sëmundje, të përmirësojmë arsimin dhe t’u japim njerëzve më shumë kohë për t’ua kushtuar gjërave që kanë më shumë rëndësi.”
Por ai paralajmëroi se njerëzit duhet të bëjnë zgjedhje të kujdesshme për mënyrën se si inteligjenca artificiale bëhet pjesë e jetës së tyre.
Ai shtoi: “Suksesi i inteligjencës artificiale duhet të matet me shkallën në të cilën ajo përmirëson jetën e njerëzve.”
Ndër kandidatët e tjerë për Fjalën e Vitit ishin “agent” (agjent), një emër që i referohet një sistemi të inteligjencës artificiale, i cili mund të kryejë veprime komplekse pa kontrollin e njeriut, si dhe “wholesome” (i shëndetshëm dhe pozitiv) dhe “analogue” (analog).
Ndër fjalët e reja të shtuara në fjalor ishin edhe terma të rrjeteve sociale, si “aura farming”, që nënkupton përpjekjen për t’u dukur tërheqës ose mbresëlënës, dhe “looksmaxxing”, që i referohet përpjekjes për të përmirësuar pamjen fizike.
Fjalori po shqyrton gjithashtu përfshirjen e termit “FOBO”, që nënkupton frikën se mos bëhesh i panevojshëm, ndërsa po rriten shqetësimet se inteligjenca artificiale mund të zëvendësojë vendet e punës./DPA News
