Dakota Johnson duket se ka hyrë zyrtarisht në humorin e vjeshtës dhe ndryshimi këtë herë nuk është vetëm te gardëroba. Aktorja është shfaqur me një ngjyrë flokësh më të errët se zakonisht, duke i dhënë pamjes së saj një nuancë më gotike dhe pak më të guximshme.
Johnson mori pjesë në mbrëmjen e pestë vjetore të Fondacionit Kering, “Caring For Women Dinner”, më 10 shtator në Nju Jork, ku u shfaq me flokë në një nuancë shumë të errët kafe. Ndryshimi u realizua nga parukieri Mark Townsend dhe është dukshëm më dramatik krahasuar me tonet më të buta që aktorja ka mbajtur kohët e fundit.
Në prill, Dakota zgjodhi një pamje shumë më të çelët për pranverën, me fije në nuancë mjalti, ndërsa gjatë qëndrimit në Romë u shfaq me ngjyrën më të çelët të flokëve që kishte mbajtur prej vitesh. Në atë periudhë, ajo kishte shkurtuar edhe baluket, duke zgjedhur një version shumë të shkurtër, paksa të çrregullt dhe rreth një centimetër mbi vetulla.
Megjithatë, një element i pamjes së saj mbetet i pandryshuar: baluket karakteristike. Vitin e kaluar, aktorja tregoi se i ka prerë vetë që kur ishte fëmijë.
“Kam pasur baluke që kur isha fëmijë”, tregoi ajo për Vogue Germany, duke rrëfyer se i kishte prerë vetë për herë të parë rreth moshës katërvjeçare. Sipas saj, baluket janë bërë aq shumë pjesë e identitetit të saj, saqë ndihet më shumë vetvetja kur i ka.
Por flokët e rinj nuk ishin e vetmja surprizë e mbrëmjes.
Për këtë dalje, Dakota zgjodhi një fustan dramatik prej kadifeje të zezë nga Valentino, me një hapje të madhe në pjesën e përparme që zbriste deri në stomak. Fustani kishte mëngë të gjata dhe të gjera, shpinë të zbuluar, një kapuç të gjelbër të mbuluar me temina dhe një bisht të gjatë që ndiqte siluetën.
Pamjen e plotë e shoqëroi me bizhuteri Lisa Eisner dhe një manikyr të zi, duke e çuar edhe më tej atmosferën gotike të veshjes.
Me flokët shumë më të errët, baluket e saj të pandryshuara dhe fustanin e zi dramatik, Dakota Johnson dukej sikur kishte vendosur t’i jepte vjeshtës një version pak më misterioz të stilit të saj.
Në mbrëmje morën pjesë edhe Pamela Anderson, Simone Biles dhe Salma Hayek. Veprimtaria mblodhi fonde për organizata që mbështesin viktimat e dhunës me bazë gjinore./ANABEL
